मुंबईच्या लोकल रेल्वेत प्रवाशांचे जीव गमावण्याच्या वाढत्या घटनांमुळे रेल्वे प्रशासनाने मोठा निर्णय घेतला आहे. ठाणे–मुंब्रा दरम्यान अलीकडेच घडलेल्या अपघातांनंतर रेल्वेमंत्री अश्विनी वैष्णव यांनी आपत्कालीन बैठक घेतली. या बैठकीत सर्व नॉन-एसी लोकल ट्रेनमध्ये ‘स्वयंचलित दरवाजे’ बसवण्याचा निर्णय घेण्यात आला. हा निर्णय जानेवारी २०२६ पर्यंत अंमलात येणार असून, मुंबई लोकलचे सुरक्षात्मक रूपांतर सुरू झाले आहे.
नवीन कोच डिझाइनमध्ये तीन महत्त्वाचे बदल केले जाणार आहेत: पहिला म्हणजे दरवाजांवर झडपी संरचना जेणेकरून हवाही खेळती राहील, दूसरा छपरावर नैसर्गिक वेंटिलेशनसाठी यंत्रणा, आणि तिसरा कोचमधील गर्दी नियंत्रित करण्यासाठी इंटरकनेक्टेड डब्बे. यासोबतच व्हेस्टिब्युल कनेक्शनही देण्यात येईल, जेणेकरून प्रवासी एका डब्यातून दुसऱ्यात सरळ जाऊ शकतील. या बदलांमुळे प्रवास अधिक सुरक्षित व सोयीचा होईल.
सध्याच्या लोकल डब्यांमध्येही हे दरवाजे बसवण्यासाठी “रेट्रोफिट” योजना तयार करण्यात आली आहे. हे दरवाजे पूर्णपणे स्वयंचलित असतील – स्टेशनवर पोहोचल्यावरच उघडतील आणि निघाल्यावर बंद होतील. यामुळे प्रवाशांनी उघड्या दरवाजांतून प्रवास करण्याची सवय बंद होईल आणि अपघातांची शक्यता लक्षणीयरीत्या कमी होईल. मुंबईतील ८० लाखांहून अधिक रोजचे लोकल प्रवासी याचा थेट लाभ घेणार आहेत.
