काश्मीरमधील पहलगाम येथे २२ एप्रिल रोजी झालेल्या भीषण दहशतवादी हल्ल्यावर आंतरराष्ट्रीय स्तरावर तीव्र प्रतिक्रिया उमटल्या असून, क्वाड समूहातील चारही देशांनी भारत, अमेरिका, जपान, ऑस्ट्रेलिया संयुक्त निवेदनाद्वारे या घटनेचा कडक शब्दांत निषेध केला आहे. त्यांनी म्हटले की, “दहशतवाद्यांना आणि त्यांना मदत करणाऱ्यांना कोणतीही सूट देऊ नये.”
या हल्ल्यात पंचवीस भारतीय आणि एका नेपाळी नागरिकाचा मृत्यू झाला होता, तसेच अनेकजण गंभीर जखमी झाले होते. क्वाड देशांनी हल्ल्यात बळी पडलेल्यांच्या कुटुंबीयांप्रती शोक व्यक्त करत दहशतवाद्यांना संरक्षण देणाऱ्या घटकांना जबाबदार धरावे, अशी मागणी केली आहे.
संयुक्त निवेदनात म्हटले आहे की, “ज्यांनी हा हल्ला घडवून आणला, त्याचे नियोजन केले आणि आर्थिक सहाय्य दिले, अशा सर्वांना न्यायासमोर आणणे गरजेचे आहे.” तसेच, त्यांनी संयुक्त राष्ट्र संघाच्या ठरावांनुसार सर्व देशांनी सहकार्य करावे, असेही नमूद केले आहे.
भारताचे परराष्ट्र मंत्री एस. जयशंकर यांनी या घटनेनंतरच्या चर्चेत स्पष्ट केले की, “भारत दहशतवादाच्या कोणत्याही प्रकारास सहन करणार नाही. हा हल्ला केवळ भारतावर नव्हे, तर मानवतेवरच होता. क्वाड देशांचे समर्थन ही आंतरराष्ट्रीय पातळीवरील एक सकारात्मक पावती आहे.”
या निवेदनामुळे क्वाड देशांच्या दहशतवादविरोधी धोरणाला अधिक बळ मिळाले असून, दहशतवाद्यांना मदत करणाऱ्या राष्ट्रांवरही दबाव वाढण्याची शक्यता आहे. यामुळे भारताच्या भूमिकेला जागतिक पातळीवर पाठबळ मिळाल्याचे स्पष्टपणे दिसून येत आहे.
