Tag: Maharashtra Health Department

राज्य सरकारने वैद्यकीय क्षेत्रातील विविध पद्धती एकत्रित आणत नागरिकांना दर्जेदार सेवा देण्याचे ठरवले आहे.

सध्याच्या आरोग्य व्यवस्थेत कोणत्याही एकाच उपचारपद्धतीतून रुग्णाला सर्वसमावेशक सेवा मिळण्यात मर्यादा येतात. या समस्येवर मात करण्यासाठी आयुर्वेद, युनानी, होमिओपॅथी आणि ॲलोपॅथी या सर्व शाखांमधील चांगल्या गोष्टी एकत्र आणून रुग्णकेंद्रित यंत्रणा उभी करणे आवश्यक बनले आहे. यापूर्वी मध्य प्रदेश राज्यासाठी अशा प्रकारचा अहवाल तयार करण्यात आला होता. त्याच धर्तीवर महाराष्ट्रात अभ्यासगटाने काम सुरू केले आहे. विविध वैद्यकीय महाविद्यालयांचे प्राध्यापक, संशोधक आणि आयुष विभागाचे अधिकारी या प्रक्रियेत सहभागी आहेत. उपचारांदरम्यान रुग्णांचे हक्क अबाधित राखणे, औषधांच्या परिणामांची अचूक नोंद ठेवणे आणि प्रायोगिक तत्त्वावर एकात्मिक दवाखाने सुरू करणे या मुद्द्यांवर समिती अहवाल देणार आहे.