मराठी चित्रपटसृष्टीत सध्या एका आगळ्यावेगळ्या विषयावर आधारित चित्रपटाची चर्चा रंगली आहे, तो चित्रपट म्हणजे ‘सुपर डुपर’. या चित्रपटातील ‘कुकडू-कू’ हे अत्यंत उत्साही आणि धमाकेदार गाणे २४ मार्च २०२६ रोजी प्रदर्शित झाले असून या गाण्याने रसिक प्रेक्षकांचे लक्ष वेधून घेतले आहे. “छोटा पाकीट, मोठा धमाका” अशा शब्दांत या गाण्याचे वर्णन केले जात असून विशेष म्हणजे हे गाणे लहान मुलांनी मोठ्यांसाठी गायले आहे. झी म्युझिक मराठीच्या अधिकृत चॅनेलवर हे गाणे उपलब्ध असून अल्पावधीतच याला पसंती मिळत आहे.
या गाण्याच्या संगीताची धुरा अभिनय जगताप यांनी सांभाळली असून त्यांनीच हे गाणे स्वरबद्ध केले आहे. अभिनय जगताप यांच्यासोबत अंशुमन मोरे या बालगायकाच्या आवाजातील गोडवा गाण्याला एक वेगळीच रंगत देतो. गाण्यातील शब्दरचना समीर आशा पाटील यांची असून त्यांनी मुलांच्या निरागसतेला साजेसे आणि प्रभावी शब्द गुंफले आहेत. गाण्यातील ठेका इतका लयबद्ध आहे की तो ऐकताच कोणाचेही पाय थिरकतील. रिदमपासून ते बॅकिंग व्होकल्सपर्यंत प्रत्येक तांत्रिक बाजूवर अतिशय सूक्ष्म काम करण्यात आले आहे.
गाण्यातील नृत्याबद्दल बोलायचे झाले तर प्रसिद्ध कोरिओग्राफर रंजू व्ही. वर्गीस यांनी याचे नृत्यदिग्दर्शन केले आहे. तर संजय जाधव यांच्या सिनेमॅटोग्राफीमुळे गाणे दृश्यात्मकरीत्या अत्यंत देखणे झाले आहे. या चित्रपटात ललित प्रभाकर आणि विदुला चौगुले यांची नवी जोडी मुख्य भूमिकेत दिसणार आहे. त्यांच्यासोबत निर्मिती सावंत, कुशल बद्रिके, नम्रता संभेराव, हृषिकेश जोशी, शशांक शेंडे आणि प्रतीक्षा कोते यांसारख्या दिग्गज कलाकारांची मांदियाळी आहे. या तगड्या स्टारकास्टमुळे चित्रपटाबद्दलची उत्सुकता अधिकच वाढली आहे.
‘सुपर डुपर’ चित्रपटाचे लेखन आणि दिग्दर्शन समीर आशा पाटील यांनी केले असून, ९९ प्रोडक्शन्स आणि सिद्धिविनायक प्रोडक्शन्स यांनी या चित्रपटाची निर्मिती केली आहे. झी स्टुडिओजच्या माध्यमातून हा चित्रपट सादर केला जात आहे. “थोरांच्या राज्यात पोरांचा वाढणार जोर” असे म्हणत या चित्रपटाने एक वेगळी थीम मांडण्याचा प्रयत्न केला आहे. हा कौटुंबिक मनोरंजक चित्रपट येत्या ३ एप्रिल २०२६ रोजी आपल्या जवळच्या चित्रपटगृहात प्रदर्शित होणार आहे. या ‘कुकडू-कू’ गाण्याने चित्रपटाच्या प्रदर्शनाआधीच एक आनंदी आणि उत्साही वातावरण निर्माण केले आहे.