मराठी संगीत विश्वात आपल्या आगळ्यावेगळ्या आवाजाची आणि शैलीची छाप पाडणारा लोकप्रिय गायक संजू राठोड पुन्हा एकदा एका भव्य गाण्यासह प्रेक्षकांच्या भेटीला येत आहे. संजूने आपल्या गायकीने केवळ महाराष्ट्रच नव्हे तर जागतिक स्तरावर मराठी संगीताची ओळख निर्माण केली आहे. ‘गुलाबी साडी’ या गाण्याने जगभरातील समाजमाध्यमांवर धुमाकूळ घातल्यानंतर आता संजू त्याच्या ‘बँगल्स’ या नवीन गाण्यामुळे चर्चेत आला आहे. या गाण्याची अधिकृत घोषणा झाल्यापासूनच संगीत प्रेमींमध्ये मोठी उत्सुकता निर्माण झाली असून या गाण्याकडूनही मोठ्या यशाची अपेक्षा व्यक्त केली जात आहे. गेल्या काही महिन्यांपासून विश्रांतीवर असलेल्या संजूने आता आपल्या आगामी प्रकल्पाची माहिती देऊन चाहत्यांना आनंदाचा धक्का दिला आहे.
या गाण्याचे सर्वात मोठे आकर्षण म्हणजे संजू राठोड आणि ईशा मालवीय यांची जोडी. यापूर्वी ‘शॅकी शॅकी’ या गाण्यातून या दोघांनी प्रेक्षकांचे मन जिंकले होते. त्या गाण्याला मिळालेली अफाट पसंती आणि त्यांची पडद्यावरील केमिस्ट्री पाहता निर्मात्यांनी पुन्हा एकदा या जोडीला एकत्र आणण्याचा निर्णय घेतला आहे. पोस्टरमधील दोघांचा अवतार पाहून चाहत्यांनी या गाण्याला ‘शॅकी शॅकी २.०’ असे संबोधण्यास सुरुवात केली आहे. संजूचा लूक यावेळी काहीसा वेगळा आणि अधिक स्टायलिश असून ईशा मालवीयचा ग्लॅमरस अवतार या गाण्याची शोभा वाढवणार हे निश्चित आहे. ईशाने यापूर्वीही संजूच्या गाण्यांमध्ये आपल्या नृत्याने आणि सौंदर्याने चांगलीच भर टाकली होती त्यामुळे ही जोडी पुन्हा एकदा प्रेक्षकांना मोहिनी घालण्यासाठी सज्ज झाली आहे.
गाण्याचे शीर्षक ‘बँगल्स’ म्हणजेच ‘बांगड्या’ असे असून पोस्टरमध्येही या संकल्पनेचा वापर अतिशय कल्पकतेने करण्यात आला आहे. संजूच्या गाण्यांमध्ये अनेकदा स्त्री सौंदर्याचे वर्णन करणाऱ्या पारंपारिक वस्तूंचा जसे की साडी, बिंदी आणि आता बांगड्या, समावेश असतो. हीच गोष्ट सर्वसामान्य प्रेक्षकांना त्याच्या गाण्यांशी भावनिकरीत्या जोडून ठेवते. संजूने १४ एप्रिल २०२६ रोजी या गाण्याचे पोस्टर प्रदर्शित केले असून त्यावर ‘लवकरच येत आहे’ असे नमूद केले आहे. पोस्टरमध्ये संजूने कोट, लाल टोपी आणि टाय असा हटके पेहराव केला आहे, तर ईशा हॉट आणि ग्लॅमरस लूकमध्ये दिसत आहे. गाण्याच्या नावाप्रमाणेच पोस्टरमध्ये सगळीकडे बांगड्यांचा वापर करण्यात आला असून हा रंगीबेरंगी आणि उत्साही माहौल गाण्याच्या यशाची खात्री देतो.
सध्या या गाण्याच्या प्रदर्शनाची अधिकृत तारीख गुलदस्त्यात असली, तरी येत्या काही दिवसांत संजू आपल्या अधिकृत समाजमाध्यमांवरून याबद्दलची घोषणा करण्याची शक्यता आहे. सहसा पोस्टर प्रदर्शित झाल्यानंतर काही दिवसांतच गाणे भेटीला येते त्यामुळे एप्रिल अखेरपर्यंत हे गाणे प्रदर्शित होईल असा अंदाज वर्तवला जात आहे. दर्जेदार संगीत, ईशा मालवीयचा वावर आणि संजू राठोडचा अनोखा आवाज यामुळे हे गाणे नक्कीच लोकप्रियतेचे सर्व विक्रम मोडेल अशी चिन्हे दिसत आहेत.