Category: मराठी चित्रपट

मराठी चित्रपटसृष्टीत वास्तवाशी घट्ट नातं जोडणारे चित्रपट क्वचितच दिसतात पण ‘तीन पायांचा घोडा’ हा चित्रपट त्या प्रवाहातला एक संवेदनशील अपवाद ठरतो. दिनांक 7 नोव्हेंबर २०२५ रोजी प्रदर्शित झालेल्या या चित्रपटाचे सादर करते सुप्रसिद्ध गायक राहुल देशपांडे आणि मुग्धा श्रीकांत देसाई हे असून कुणाल शुक्ला, रिया नलावडे आणि अविनाश लोंढे यांनी प्रभावी अभिनय केला आहे. त्यांच्या सोबत देविका दप्तरदार आणि गजानन परांजपे यांनीही आपल्या भूमिका उत्कृष्टरीत्या साकारल्या आहेत. नुपूर बोरा यांनी दिग्दर्शित केलेला हा चित्रपट २००० च्या दशकाच्या सुरुवातीच्या पुण्यात घडणाऱ्या एका भावस्पर्शी आणि अनोख्या मैत्रीची कथा सांगतो. जी नात्यांचा, स्वप्नांचा आणि बदलत्या काळाचा अर्थ नव्याने समजावते.

२००३ साल आहे. पुणे शहर अजूनही शांत आहे, ट्रॅफिक कमी आहे आणि लोक प्रत्यक्ष भेटून बोलतात. नोकिया फोन, कायनेटिक होंडा स्कूटर आणि चालणाऱ्या माणसांच्या आवाजांनी शहराच्या रस्त्यांवर एक वेगळंच संगीत घुमतं. या काळात तंत्रज्ञान आणि जीवनशैली दोन्ही बदलाच्या उंबरठ्यावर आहेत. या पार्श्वभूमीवर घडते अदनान, चंद्रिका आणि राठोड यांची कथा.

अदनान हा बारावीची परीक्षा वारंवार नापास होणारा मुलगा. त्याच्या आयुष्यात मोठं स्वप्न नाही, पण त्याच्या आजोबा म्हणजेच गजानन परांजपे यांचा त्याच्यावर प्रचंड विश्वास आहे. दुसरीकडे चंद्रिका ही एक महत्वाकांक्षी मुलगी आहे. अभिनय क्षेत्रात नाव कमावण्याचं तिचं स्वप्न आहे. अदनान आणि चंद्रिका यांचं नातं कोवळं आणि प्रामाणिक आहे पण आयुष्याच्या वास्तवात ते दोघं हरवतात.

त्याच वेळी त्यांच्या आयुष्यात प्रवेश करतो राठोड बनावट कागदपत्रं तयार करण्यात पटाईत, पण मनाने संवेदनशील मुलगा. चंद्रिका जेव्हा अदनानसाठी बनावट मार्कशीट मिळवण्यासाठी राठोडकडे जाते, तेव्हा एक वेगळीच मैत्री जन्म घेते. तिघे मिळून त्यांच्या लहानसहान साहसांचा आनंद घेतात, पण त्यांना कल्पनाही नसते की हाच प्रवास त्यांच्या आयुष्यात आणि शहरात एक मोठा बदल घडवून आणणार आहे.

चित्रपटाचं नाव “तीन पायांचा घोडा” हेच त्याचं योग्य शीर्षक आहे . जीवनात असंतुलन असलं तरी पुढे जाण्याची धडपड थांबत नाही. दिग्दर्शक नुपूर बोरा यांनी या संकल्पनेला अत्यंत संवेदनशीलतेने हाताळलं आहे. पात्रांची वाढ, नात्यांची गुंतागुंत आणि काळाचा बदल हे सर्व घटक इतक्या सहजतेने मांडले आहेत की प्रेक्षकांना स्वतःचं आयुष्य पडद्यावर उमटल्यासारखं वाटतं.

चित्रपटाचं छायाचित्रण आणि संगीत दोन्हीही भावनांना पूरक आहेत. जुन्या पुण्याचं वातावरण, गल्ल्या, स्कूटरचा आवाज आणि कॉल सेंटरच्या जगात पाऊल ठेवणारी तरुणाई. हे सगळं दृश्यरूपाने अनुभवताना प्रेक्षकही त्या काळात जातात. देविका दप्तरदार आणि गजानन परांजपे यांच्या भूमिका विशेष उल्लेखनीय आहेत. त्यांच्या अभिनयातून चित्रपटाला भावनिक खोली मिळते.

समीक्षकांनी या चित्रपटाला पाच पैकी साडेतीन गुण दिले आहेत. प्रेक्षकांकडूनही सकारात्मक प्रतिसाद मिळत आहे. सोशल मीडियावर “आजच्या पिढीचा आरसा” आणि “नात्यांचा अर्थ नव्याने उलगडणारा प्रवास” अशा प्रतिक्रिया दिसत आहेत.

एकूणच ‘तीन पायांचा घोडा’ हा केवळ एका काळाची कथाच नाही तर ती बदलत्या शहरातल्या तरुणांच्या भावविश्वाची त्यांच्या संघर्षाची आणि नात्यांच्या असंतुलनातून निर्माण होणाऱ्या संवेदनशील वास्तवाची जाणीव करून देणारी गोष्ट आहे. तरुणाईने हा चित्रपट नक्कीच एकदातरी अनुभवावा असा आहे.

प्रेक्षकांच्या भेटीला लवकरच छत्रपती शिवाजी महाराजांचा एक नवा चित्रपट येणार आहे. आणि तो चित्रपट म्हणजे ‘राजा शिवाजी’ रितेश विलासराव देशमुख दिग्दर्शित हा सिनेमा 2026 मध्ये प्रदर्शित होणार असून या भव्य ऐतिहासिक चित्रपटात बॉलिवूडचा दमदार अभिनेता संजय दत्त ‘अफजलखान’ ही गाजलेली भूमिका साकारणार आहे.

‘राजा शिवाजी’ हा चित्रपट छत्रपती शिवाजी महाराजांच्या पराक्रमावर आधारित असून त्यांच्या आयुष्यातील सर्वात महत्त्वाचा प्रसंग म्हणजे प्रतापगडचा संग्राम. या चित्रपटाचा केंद्रबिंदू असेल. महाराजांच्या विश्वासू ‘जिवा महाला’ ची भूमिका देखील चित्रपटात तितकीच ठसठशीत आणि भावपूर्ण स्वरूपात सादर केली जाणार आहे.

संजय दत्त यांच्या अफजलखानच्या भूमिकेमुळे या चित्रपटात अधिक ताकद आणि भव्यता येणार आहे. त्यांच्या व्यक्तिमत्त्वातील गांभीर्य, तीव्रता आणि अभिनयातील वजन या ऐतिहासिक पात्राला नवे रूप देणार आहेत. दुसरीकडे, रितेश देशमुख दिग्दर्शक म्हणून पुन्हा एकदा मराठी प्रेक्षकांसाठी वेगळा अनुभव घेऊन येत आहेत.

‘राजा शिवाजी’चे चित्रीकरण महाराष्ट्रातील ऐतिहासिक किल्ल्यांवर आणि भव्य सेट्सवर होत असून युद्धदृश्यं आणि पार्श्वसंगीताच्या माधुर्यामुळे हा सिनेमा दृश्यरम्य आणि भावनिक अनुभव ठरण्याची चिन्हं आहेत.

सध्या सोशल मीडियावर या चित्रपटाची जोरदार चर्चा सुरू असून संजय दत्तच्या अफजलखान रूपातील दमदार लुकबद्दल चाहत्यांमध्ये प्रचंड उत्सुकता आहे. लवकरच प्रेक्षकांना “राजा शिवाजी विरुद्ध अफजलखान” हा ऐतिहासिक संघर्ष मोठ्या पडद्यावर पाहायला मिळणार आहे.

मराठी चित्रपटसृष्टीत पुन्हा एकदा भक्ती, अध्यात्म आणि समाजपरिवर्तनाचा संगम अनुभवायला मिळाला तो म्हणजे दिग्पाल लांजेकर दिग्दर्शित ‘अभंग तुकाराम’. दिनांक ७ नोव्हेंबर २०२५ रोजी प्रदर्शित झालेला हा चित्रपट जगद्गुरू संत तुकाराम महाराजांच्या जीवनावर आणि त्यांच्या अभंगांच्या गाथेवर आधारित असून तो केवळ धार्मिक चित्रपटच न राहता मानवी मूल्यांचा आणि श्रद्धेचा अनुभव देतो. या चित्रपटात योगेश सोमण यांनी संत तुकाराम महाराजांची भूमिका साकारली आहे तर स्मिता शेवाळे त्यांच्या पत्नी आवलीच्या भूमिकेत दिसते. अजय पूरकर एका विशेष भूमिकेत आहेत. ‘अभंग तुकाराम’ हा तुकाराम महाराजांच्या जीवनातील संघर्ष, भक्ती आणि समाजाशी असलेल्या नात्याचं प्रभावी चित्रण आहे. देहूच्या भूमीत उगवलेला एक साधा व्यापारी समाजातील अन्याय, जातीभेद आणि अंधश्रद्धांच्या विरोधात उभा राहतो आणि भक्तीमार्गावर आत्मशांती शोधतो हाच त्याच्या जीवनाचा खरा ‘अभंग’ ठरतो.

योगेश सोमण यांचा अभिनय या चित्रपटाचा आत्मा आहे. त्यांच्या डोळ्यांतील शांतता आणि आवाजातील भक्तीभाव तुकाराम महाराजांच्या व्यक्तिमत्त्वाला जिवंत करतात. स्मिता शेवाळेची ‘आवली’ ही केवळ पत्नी नसून तुकारामांच्या भक्तीचा आरसा आहे. तिचा राग, वेदना आणि शेवटी झालेलं समाधान हे सर्व स्मिताने अत्यंत प्रभावीपणे अभिनयातून प्रेक्षकांपर्यंत पोहोचवलं आहे. या चित्रपटाचे सर्वात मोठे वैशिष्ट्य म्हणजे त्यातील वारकरी संगीत आहे. तब्बल दहा अभंगांचा समावेश असलेल्या या चित्रपटात प्रत्येक अभंग प्रसंगानुसार गुंफला गेला आहे. वीणेचा नाद, पखवाजाचे ठोके आणि तबल्याचे सूर हा आध्यात्मिक क्षण प्रेक्षकांना वारीच्या भावविश्वात घेऊन जातो. संगीतकारांनी भक्तीभावाला आधुनिकतेचा स्पर्श देत एक हृदयस्पर्शी वातावरण तयार केलं आहे.

दिग्दर्शक दिग्पाल लांजेकर यांनी या चित्रपटात भक्ती आणि वास्तवाचा समतोल अप्रतिम राखला आहे. ऐतिहासिक पार्श्वभूमी, देहूतील जीवन, वारीचे दृश्य आणि तुकाराम महाराजांच्या समाधीचा प्रवास याचे छायाचित्रण अत्यंत मोहक आणि भावपूर्ण आहे. संवाद, वेशभूषा आणि दृश्यरचना या सर्व घटकांनी चित्रपटाला ऐतिहासिक सौंदर्य लाभले आहे. ‘अभंग तुकाराम’ पाहताना जाणवतं की हा केवळ धार्मिक चित्रपटच नाही तर मानवतेचा सण आहे. तुकाराम महाराजांचा “जे का रंजले गांजले त्यांसी म्हणे जो आपुले” हा विचार आजही तितकाच लागू पडतो. भक्ती ही फक्त देवापर्यंत पोहोचण्याचं साधन नसून समाजपरिवर्तनाचं शस्त्र आहे असा संदेश या चित्रपटातून प्रभावीपणे उमटतो.

एकंदरीत ‘अभंग तुकाराम’ हा प्रेक्षकांना अंतर्मुख करणारा, विचार करायला लावणारा आणि मनात शांततेचा ओलावा निर्माण करणारा सिनेमा आहे. अभिनय, संगीत, दिग्दर्शन आणि संत तुकाराम महाराजांच्या विचारांचा सुंदर मिलाफ या चित्रपटाला वेगळ्या उंचीवर नेतो. काही ठिकाणी गती मंदावली तरी भक्तीभाव आणि अभिनयाची खोली त्या त्रुटींवर मात करते. अभंग हे केवळ ओव्या नाही तर ते जिवंत अनुभव आहेत आणि त्या अनुभवांना पडद्यावर उतरवण्यात हा चित्रपट यशस्वी ठरतो. भक्ती, अभिनय आणि संदेश या तिन्ही स्तरांवर तो उत्कृष्ट ठरतो. त्यामुळे ‘अभंग तुकाराम’ चित्रपटाला पाच पैकी साडेचार गुण देत त्याला “मनाला शांती देणारी आणि विचारांना उजाळा देणारी” भव्यदिव्य कलाकृतीची विलक्षण कथा असं म्हणणं योग्य ठरेल.

महेश मांजरेकर दिग्दर्शित ‘पुन्हा शिवाजीराजे भोसले’ या चित्रपटाने बॉक्स ऑफिसवर दमदार सुरुवात केली आहे. दिनांक ३१ ऑक्टोबर २०२५ रोजी प्रदर्शित झालेल्या या चित्रपटाला प्रेक्षकांचा प्रचंड प्रतिसाद मिळत असून थिएटर्समध्ये ‘हाऊसफुल’चे फलक झळकू लागले आहेत.अभिनेता सिद्धार्थ बोडके याने या चित्रपटात छत्रपती शिवाजी महाराजांची भूमिका साकारली आहे. महाराष्ट्राच्या अस्मितेचा आणि प्रेरणेचा मानबिंदू असलेले महाराज आजच्या काळात अवतरतात आणि शेतकऱ्यांच्या अस्तित्वासाठी लढा देतात.अशी या चित्रपटाची प्रभावी कथा आहे.

‘पुन्हा शिवाजीराजे भोसले’ने पहिल्याच दिवशी एकोणीस लाख रुपयांची कमाई केली, तर दुसऱ्या दिवशी हा आकडा चौतीस लाखांपर्यंत पोहोचला. अशा प्रकारे केवळ दोन दिवसांत चित्रपटाने त्रेपन्न लाख रुपयांचा गल्ला जमवला आहे. रविवारी सुट्टीच्या दिवशी कमाईत आणखी वाढ झाली आहे.चित्रपटात सिद्धार्थ बोडकेसोबत विक्रम गायकवाड, शशांक शेंडे, मंगेश देसाई, पृथ्वीक प्रताप, सयाजी शिंदे, तसेच राष्ट्रीय पुरस्कार विजेते बालकलाकार त्रिशा ठोसर आणि भार्गव जगताप यांच्या भूमिका पाहायला मिळतात. कथा आणि पटकथा स्वतः महेश मांजरेकर यांनी लिहिली असून संवाद सिद्धार्थ साळवी यांचे आहेत.

महेश मांजरेकर म्हणतात, “शेतकरी आत्महत्येचा विषय मला अनेक वर्षांपासून अस्वस्थ करत होता. या विषयावर बोलणं आणि तो समाजासमोर मांडणं ही काळाची गरज आहे. आजच्या काळातील शेतकऱ्यांची परिस्थिती पाहून महाराज किती संतप्त होतील, हे प्रेक्षकांना या चित्रपटातून दिसेल. हा प्रत्येक मराठी माणसाचा चित्रपट आहे.” चित्रपटाबद्दल मनसे अध्यक्ष राज ठाकरे यांनीही महाराष्ट्रातील जनतेला तो पाहण्याचं आवाहन केलं आहे. दमदार विषय, ऐतिहासिक संदर्भ आणि आधुनिक वास्तव यांचा संगम असलेल्या या चित्रपटाची ‘माऊथ पब्लिसिटी’मुळे ही कमाई मोठी झेप घेण्याची शक्यता आहे.

सोशल मीडियावर चित्रपटाबद्दल कौतुकाचा वर्षाव होत आहे. अनेकांनी सिद्धार्थ बोडके यांच्या अभिनयाचं आणि चित्रपटातील संवादांचं विशेष कौतुक केलं आहे. आयएमडीबीवर सध्या या चित्रपटाला दहा गुणांपैकी सात पूर्णांक आठ रेटिंग मिळालं असून गूगलवर अठ्याऐंशी टक्के प्रेक्षकांनी सकारात्मक प्रतिक्रिया दिली आहे.