झी स्टुडिओज् निर्मित ‘तुंबाडची मंजुळा’ या आगामी मराठी चित्रपटाची सध्या सर्वत्र जोरदार चर्चा सुरू आहे. उमेश कुमार बन्सल आणि भावेश जानावळेकर यांची निर्मिती आणि विविघ कोरगावकर यांचे दिग्दर्शन असलेला हा बहुप्रतीक्षित चित्रपट ५ जून २०२६ रोजी प्रेक्षकांच्या भेटीस येत आहे. या चित्रपटाची उत्सुकता शिगेला पोहोचलेली असतानाच, चित्रपटातील ‘तराट’ हे गाणे १५ मे २०२१ रोजी सोशल मीडिया आणि युट्यूबवर अधिकृतपणे रिलीज करण्यात आले. हे गाणे रिलीज होताच अवघ्या सात दिवसांतच या गाण्याने प्रेक्षकांचा अफाट प्रतिसाद मिळवला असून, त्याला १७ लाखांपेक्षा जास्त व्ह्यूज आणि हजारो लाईक्स मिळाले आहेत. हा आकडा सातत्याने वाढत असून सोशल मीडियावर सध्या या गाण्याचीच क्रेझ पाहायला मिळत आहे.
या गाण्याचे सर्वात मोठे आकर्षण म्हणजे बॉलिवूडचे प्रसिद्ध गायक विशाल दादलाणी यांचा दमदार आवाज. विशाल दादलाणी यांनी आपल्या अनोख्या, ठसकेबाज आणि ऊर्जावान शैलीत हे गाणे गायले आहे. “तर्राट… चाललो ढगात, आज बुंगाट!” अशा जबरदस्त ओळींनी सुरू होणारे हे गाणे ऐकताना रसिक प्रेक्षक थिरकल्याशिवाय राहू शकत नाहीत. हे गाणे एक अस्सल ‘नॉन-स्टॉप मराठी डान्स नंबर’ म्हणून समोर आले असून आगामी काळातील सर्व सण-उत्सव, लग्नकार्ये आणि पार्ट्यांमध्ये हे गाणे डीजेवर धुमाकूळ घालणार हे निश्चित आहे. विक्रम एडके यांनी या गाण्याचे थेट मनाला भिडणारे शब्द लिहिले असून झरिया, प्रतीक ओमकार केळकर आणि तेजस आदित्य जोशी यांनी याला जबरदस्त संगीत दिले आहे.
गाण्याच्या व्हिडिओमध्ये एका जत्रेचा किंवा मोठ्या उत्सवाचा माहोल दाखवण्यात आला आहे. रंगीबेरंगी रोषणाई आणि गावकऱ्यांचा जल्लोष यांमुळे व्हिडिओ अतिशय रंगतदार झाला आहे. मराठी चित्रपटसृष्टीतील कसलेले अभिनेते जितेंद्र जोशी आणि ओम भुतकर हे या गाण्यात संपूर्ण ऊर्जेनिशी गावकऱ्यांसोबत डान्स करताना दिसत आहेत. विशाल दादलाणी यांच्या मुख्य आवाजाला असीम आनंद कुरहेकर, प्रतीक ओमकार केळकर, तेजस आदित्य जोशी, स्वानंदी केळकर, श्रेया कुलकर्णी यांच्यासह अनेक कलाकारांनी ग्रुप व्होकल्सची उत्तम साथ दिली आहे. या गाण्याचे रेकॉर्डिंग प्रसिद्ध यश राज स्टुडिओज आणि शिवरंजनी स्टुडिओजमध्ये झाले असून मिक्सिंग-मास्टरिंगची जबाबदारी प्रतीक ओमकार केळकर यांनी यशस्वीपणे पेलली आहे.
‘तुंबाडची मंजुळा’ या चित्रपटात केवळ गाणीच नाही तर स्टारकास्टही अत्यंत तगडी आहे. यात जितेंद्र जोशी आणि ओम भुतकर यांच्यासोबत मकरंद अनासपुरे, सई ताम्हणकर, उषा नाडकर्णी, अंशुमन विचारे, प्रियल नाईक, अथर्व रुके, गणेश पंडित आणि शार्दूल सराफ यांसारख्या दिग्गज कलाकारांची फौज पाहायला मिळणार आहे.