मराठी आणि हिंदी चित्रपटसृष्टीत सध्या ‘सीक्वल’ आणि ‘फ्रँचायझी’ चित्रपटांचे वारे वाहत आहेत. याच प्रवासात प्रेक्षकांना पुन्हा एकदा हास्याच्या लाटांवर स्वार करण्यासाठी ‘पति पत्नी और वो २’ हा चित्रपट सज्ज झाला आहे. आज १५ मे २०२६ रोजी प्रदर्शित झाला असून. हा चित्रपट २०१९ मध्ये आलेल्या आणि गाजलेल्या पती पत्नी और वो या चित्रपटाचा विनोदी आणि अनोखा सिक्वल आहे. दिग्दर्शक मुदस्सर अजीज यांनी याही वेळी संसारातील गमतीजमती आणि नात्यांमधील गुंतागुंत अत्यंत खुसखुशीतपणे पडद्यावर मांडली आहे. हा चित्रपट केवळ एक रोमँटिक कॉमेडी नसून, लग्नानंतरच्या आयुष्यात येणारे छोटे-मोठे बदल आणि त्यातून निर्माण होणारा हास्यकल्लोळ याचा एक उत्तम नमुना आहे.
या चित्रपटाचे संपूर्ण कथानक उत्तर प्रदेशातील पवित्र आणि ऐतिहासिक प्रयागराज शहराच्या पार्श्वभूमीवर बेतलेले आहे. चित्रपटाची मूळ संकल्पना ‘शिकारी स्वतःच शिकार झाला’ या थीमवर आधारित आहे. कथेचा नायक आपल्या वैवाहिक आयुष्यात सुखी असतानाही, काही गैरसमज आणि बाहेरच्या व्यक्तीच्या हस्तक्षेपामुळे एका अशा चक्रव्यूहात अडकतो, जिथून बाहेर पडताना त्याची मोठी तारांबळ उडते. प्रयागराजचा स्थानिक लहेजा, तिथली मध्यमवर्गीय संस्कृती आणि घराघरातील संवादांमधील जिवंतपणा यामुळे हा चित्रपट प्रेक्षकांना आपल्यातीलच एक वाटतो. संशयाचे भूत जेव्हा संसारात शिरते, तेव्हा परिस्थिती किती गंभीर आणि तितकीच मजेशीर होऊ शकते, याचे उत्तम चित्रण यात पाहायला मिळते.
अभिनयाच्या आघाडीवर, आयुष्मान खुराना याने पुन्हा एकदा ‘बॉय नेक्स्ट डोअर’ प्रतिमेत कमाल केली आहे. तो आपल्या नैसर्गिक टायमिंग आणि साध्या अभिनयाने प्रेक्षकांना खिळवून ठेवतो. त्याच्यासोबत सारा अली खान, वामिका गब्बी आणि रकुल प्रीत सिंह या तीन प्रतिभावान अभिनेत्री मुख्य भूमिकेत आहेत. या तिघींच्या येण्याने चित्रपटात केवळ ग्लॅमरच नाही, तर कथानकात महत्त्वाचे वळणही येते. प्रत्येक अभिनेत्रीने आपल्या भूमिकेतील बारकावे चोखपणे बजावले आहेत. विशेषतः विजय राज यांची उपस्थिती चित्रपटात विनोदाची फोडणी देण्याचे काम करते. त्यांची संवादफेक आणि चेहऱ्यावरील हावभाव प्रेक्षकांना लोटपोट हसायला लावतात.
थोडक्यात सांगायचे तर, ‘पति पत्नी और वो २’ हे मनोरंजनाचे पूर्ण पॅकेज आहे. दर्जेदार अभिनय, रंजक कथानक आणि कर्णमधुर संगीत यामुळे हा चित्रपट एक मोठा ब्लॉकबस्टर ठरेल यात शंका नाही. जर तुम्हाला तुमच्या कुटुंबासोबत किंवा मित्रांसोबत निखळ आनंद घ्यायचा असेल, तर हा चित्रपट पाहणे एक उत्तम पर्याय ठरेल.