मराठी रंगभूमीवर सस्पेन्स थ्रिलर किंवा ‘मर्डर मिस्ट्री’ या प्रकाराला नेहमीच प्रेक्षकांनी डोक्यावर घेतले आहे. याच परंपरेतील एक नवा आणि अत्यंत उत्कंठावर्धक आविष्कार म्हणजे ‘धि गोवा हिंदू असोसिएशन’ आणि ‘सुकल्प चित्र’ निर्मित ‘सुभेदार गेस्ट हाऊस’.
प्रसिद्ध लेखक शिरीष देखणे यांच्या लेखणीतून उतरलेले आणि दिग्गज दिग्दर्शक विजय केंकरे यांच्या कल्पक दृष्टीने साकारलेले हे नाटक प्रेक्षकांना शेवटच्या क्षणापर्यंत खुर्चीला खिळवून ठेवण्यात यशस्वी ठरते. या नाटकाचे कथानक ऐतिहासिक पन्हाळ्याच्या पार्श्वभूमीवर घडते. कोल्हापुरात नुकत्याच झालेल्या एका खुनाच्या घटनेनंतर, पन्हाळ्यातील एका निर्जन ‘सुभेदार गेस्ट हाऊस’मध्ये काही अनोळखी लोक एकत्र येतात. मुसळधार पाऊस आणि वादळामुळे बाहेरील जगाशी संपर्क तुटल्यामुळे हे सर्वजण तिथे अडकून पडतात. मात्र खरा थरार तेव्हा सुरू होतो जेव्हा त्यांना समजते की खुनी हा बाहेरचा कोणी नसून त्यांच्यातच वावरत असलेला एक सदस्य आहे.
नाटकाची मांडणी अत्यंत गुंफलेली असून गेस्ट हाऊसचे मालक चित्रा आणि विनय यांच्यापासून ते तिथे आलेल्या पाहुण्यांपर्यंत अमित, मिसेस टिकेकर, मेजर थोरात, बॅनर्जी आणि मिस सपना प्रत्येक पात्राचा स्वतःचा एक गुप्त आणि संशयास्पद भूतकाळ आहे. या रहस्याचा उलगडा करण्यासाठी इन्स्पेक्टर भोसले तिथे दाखल होतात आणि तिथून सुरू होतो संशयाचा खेळ. प्रत्येक दृश्यागणिक संशयाची सुई एका पात्रावरून दुसऱ्या पात्रावर फिरत राहते ज्यामुळे प्रेक्षकांच्या मनातील उत्सुकता शिगेला पोहोचते. या नाटकाचे सर्वात मोठे वैशिष्ट्य म्हणजे शंतनू मोघे, सौरभ गोखले, मृणमयी गोंधळेकर, अंगद म्हसकर, सना कुलकर्णी, विनीता दाते, आनंद पाटील आणि रोहित देशमुख यांसारख्या कसलेल्या कलाकारांची तगडी फळी. या सर्व कलाकारांनी आपापल्या व्यक्तिरेखा इतक्या प्रभावीपणे साकारल्या आहेत की प्रत्येक जण खुनी असल्याचा भास प्रेक्षकांना होत राहतो.
नाटकाच्या तांत्रिक बाजूने या रहस्यमयी वातावरणात अधिक भर घातली आहे. प्रदीप मुळ्ये यांचे सुबक नेपथ्य पन्हाळ्यातील त्या गेस्ट हाऊसचा आभास हुबेहूब निर्माण करते तर शीतल तळपदे यांची प्रकाशयोजना आणि अजित परब यांचे पार्श्वसंगीत नाटकातील गूढता वाढवण्यास महत्त्वाची भूमिका बजावते. वैभव जोशी यांची गीते आणि मंगल केंकरे यांची वेशभूषा यांमुळे नाटकाला एक वेगळीच उंची प्राप्त झाली आहे.
कल्पक सदानंद जोशी आणि अमरजा गोडबोले यांच्या निर्मितीखालील हे नाटक, श्रीकांत तटकरे आणि राजेंद्र पै यांच्या मार्गदर्शनाखाली प्रेक्षकांसमोर आले आहे. एकूणच ‘सुभेदार गेस्ट हाऊस’ हे केवळ एक नाटक नसून प्रेक्षकांच्या बुद्धीला दिलेले एक आव्हान आहे ज्याचा शेवटचा धक्कादायक उलगडा सर्वांना चकित करून जातो.