इराण आणि इस्त्राईल यांच्यातील संघर्ष अधिक तीव्र होत चालला आहे. इराणकडून ड्रोन आणि क्षेपणास्त्रांच्या हल्ल्यांमुळे इस्त्राईलने देखील प्रतिउत्तर दिलं आहे. या पार्श्वभूमीवर दोन्ही देशांची लष्करी ताकद, संरक्षण खर्च आणि संसाधनांची तुलनात्मक झलक घेणे अत्यंत महत्त्वाचे ठरते.
इराणकडे पाचशे एक्कावन्न लढाऊ व हल्लेखोर विमाने असून एकशे तेवीस हेलिकॉप्टर आहेत. त्यात तेरा आक्रमक हेलिकॉप्टर समाविष्ट आहेत. इस्त्राईलकडे सहाशे अकरा लढाऊ व विशेष विमाने असून, एकशे सत्तेचाळीस हेलिकॉप्टर आणि अठ्ठेचाळीस आक्रमक हेलिकॉप्टर आहेत. रणगाड्यांमध्ये इराणकडे एक हजार सातशे तेरा तर इस्त्राईलकडे एक हजार तीनशे टँक आहेत. सशस्त्र भूदल वाहनांची संख्याही इराणमध्ये जास्त असून ती अठ्ठावन्न हजारांहून अधिक आहे.
नौदल सामर्थ्यात इराणकडे पंचवीस पाणबुड्या आणि सात युद्धनौका आहेत, तर इस्त्राईलकडे फक्त सात पाणबुड्यांची माहिती उपलब्ध आहे. सैनिक बळाच्या बाबतीत इराण अधिक बळकट असून, त्यांच्याकडे सहा लाख दहा हजार सक्रिय सैनिक, तीन लाख पन्नास हजार राखीव सैनिक आणि दोन लाख वीस हजार निमलष्करी कर्मचारी आहेत. इस्त्राईलचे संख्यात्मक बळ तुलनेने कमी असले तरी त्यांचे लष्कर अधिक तांत्रिकदृष्ट्या प्रगत मानले जाते.
संरक्षण खर्चाच्या तुलनेत इस्त्राईल इराणपेक्षा अधिक पुढे आहे. इस्त्राईलचा वार्षिक संरक्षण खर्च सुमारे तीस अब्ज पन्नास कोटी अमेरिकी डॉलर असून इराणचा खर्च पंधरा अब्ज पंचेचाळीस कोटी डॉलर इतका आहे. नुकत्याच दिलेल्या वक्तव्यात इस्त्राईलचे पंतप्रधान बेंजामिन नेतन्याहू यांनी इराणच्या अणुउर्जा आणि क्षेपणास्त्र कार्यक्रमांचा कायमस्वरूपी बंदोबस्त करण्याचा निर्धार व्यक्त केला आहे. त्यामुळे हा संघर्ष केवळ शब्दांचा राहणार नाही, तर प्रत्यक्ष लष्करी कारवायांमध्ये रूपांतरित होण्याची शक्यता अधिक आहे.
