नाशिक जिल्ह्यात कांद्याच्या दरांमध्ये मोठा तफावत निर्माण झाला आहे. शेतकरी बाजार समित्यांमध्ये कांदा विक्री करताना प्रति क्विंटल तीनशे ते पाचशे रुपये अधिक दर मिळवत आहेत, तर नाफेडमार्फत होणाऱ्या खरेदीत त्यांना इतकाच तोटा सहन करावा लागत आहे. त्यामुळे शेतकऱ्यांचा कल नाफेडऐवजी थेट बाजार समित्यांकडे वाढत असल्याचे स्पष्ट झाले आहे.
लासलगाव, पिंपळगाव आदी प्रमुख बाजार समित्यांमध्ये कांद्याचे दर तुलनेत जास्त आहेत. मात्र नाफेडची खरेदी केंद्रे अद्यापही निश्चित सरकारी दरावरच कांदा खरेदी करत असल्यामुळे शेतकऱ्यांमध्ये नाराजी वाढत आहे. नाफेडच्या केंद्रांवर नोंदणी झालेल्या शेतकऱ्यांना पैसे वेळेवर मिळत नाहीत, तसेच गुणवत्ता व वजनाच्या अटींमध्ये पारदर्शकता नसल्याचे आरोपही करण्यात आले आहेत.
नाफेडच्या खरेदी धोरणावर शेतकरी व कृषी संघटनांकडून तीव्र नाराजी व्यक्त होत आहे. अनेक केंद्रांवर योग्य साठवण नसल्याने कांद्याचे मोठे प्रमाणात नुकसान होते. काही केंद्रांवर खरेदी मर्यादित प्रमाणात होत असल्याने अनेक शेतकरी परत पाठवले जात आहेत. यामुळे नाफेडचा उद्देशच मोडीत निघतो, अशी प्रतिक्रिया स्थानिक शेतकऱ्यांनी दिली.
शेतकरी उत्पादक कंपन्यांनी आणि कृषी संघटनांनी मागणी केली आहे की, नाफेडने कांदा खरेदीसाठी बाजार समित्यांप्रमाणेच दर ठरवावा. तसेच, तात्काळ पैसे मिळावेत, स्टोरेजची व्यवस्था सुधारणे आणि वजन व दर्जाबाबत पारदर्शकता राखावी. अन्यथा नाफेडवरील विश्वास ढळण्याची शक्यता असून, शेतकऱ्यांचे मोठे आर्थिक नुकसान होऊ शकते.
