इस्रायलच्या लष्करी गुप्तचर विभागाने दिलेल्या अहवालानुसार, इराणचा क्षेपणास्त्र साठा २०२८ पर्यंत दहा हजारांवर जाऊ शकतो, अशी भीती व्यक्त करण्यात आली आहे. सद्यस्थितीत इराणकडे अंदाजे तीन हजार क्षेपणास्त्रे असून, प्रत्येक वर्षी त्यात झपाट्याने वाढ होत आहे. ही वाढ केवळ संख्यात्मकच नव्हे, तर गुणवत्ता, गती, श्रेणी आणि अचूकतेच्या दृष्टीनेही चिंतेचा विषय ठरत आहे.
इराणकडील क्षेपणास्त्रांमध्ये ‘फतेह-११०’, ‘झलझला’, ‘शहाब-३’ आणि ‘क्याम’ सारख्या अत्याधुनिक प्रकारांचा समावेश आहे. यांची मारक क्षमता तीनशे ते दोन हजार पाचशे किलोमीटर दरम्यान आहे आणि काही क्षेपणास्त्रांचा वेग सुमारे सतरा हजार किमी/तास इतका असल्याचे समोर आले आहे. या क्षेपणास्त्रांच्या साहाय्याने इराण संपूर्ण मध्यपूर्व आणि काही युरोपीय भागांपर्यंत लक्ष्य साधू शकतो.
इस्रायलच्या संरक्षण यंत्रणेसाठी ही वाढ गंभीर आव्हान ठरू शकते. यापूर्वी इस्रायलवर करण्यात आलेल्या क्षेपणास्त्र हल्ल्यांमध्ये त्यांच्या डोम आणि डेव्हिड स्लिंगसारख्या संरक्षण प्रणालींनी यशस्वीपणे प्रत्युत्तर दिलं होतं. परंतु जर एकाच वेळी हजारो क्षेपणास्त्रांचं आक्रमण झालं, तर संरक्षण यंत्रणा अपुरी पडण्याची शक्यता आहे.
या पार्श्वभूमीवर मध्यपूर्वेत तणाव वाढण्याची चिन्हं असून, जागतिक राजकारणातही याचे दूरगामी परिणाम जाणवू शकतात. संयुक्त राष्ट्रे आणि आंतरराष्ट्रीय अणु निरीक्षण संस्था यांना या वाढत्या शस्त्रास्त्र साठ्याकडे गांभीर्याने पाहण्याची गरज आहे, असे सुरक्षा तज्ज्ञांचे म्हणणे आहे.
