स्वतंत्र बातमी

केंद्रीय गृहमंत्री अमित शाह हे आज पुणे दौऱ्यावर असून त्यांच्या सुरक्षेच्या पार्श्वभूमीवर पुणे वाहतूक विभागाने काही मार्गांवर वाहतुकीत तात्पुरते बदल केले आहेत. या बदलांमुळे काही भागांतील नागरिकांना वाहतूक मार्गात अडथळे येऊ शकतात, त्यामुळे वैकल्पिक मार्गांचा वापर करावा, असे आवाहन प्रशासनाने केले आहे.

दुपारी बारा ते संध्याकाळी पाच वाजेपर्यंत, मंतरवाडी फाटा–खडी मशीन चौक–कात्रज चौक या मार्गावरून सर्व जड वाहने जसे की ट्रक, डंपर, मिक्सर इत्यादींना प्रवेश बंदी करण्यात आली आहे. त्यामुळे या वेळेत या मार्गांचा वापर करणाऱ्या वाहनचालकांनी पर्यायी मार्ग वापरावेत. बुंड गार्डन परिसरातील मोर ओढा ते सर्किट हाऊस चौक आणि तेथून आयबी चौकापर्यंतच्या एकेरी मार्गांवर या दिवशी दुतर्फा वाहतुकीची विशेष व्यवस्था करण्यात आली आहे. यामुळे या भागात गर्दी कमी होईल आणि प्रमुख मार्ग सुरळीत राहतील.

अमित शाहांच्या दौऱ्यामुळे वाहतूक पोलिसांचा मोठा बंदोबस्त करण्यात आला आहे. ठिकठिकाणी वाहतूक नियंत्रक तैनात करण्यात आले असून, नागरीकांना वाहन चालवताना खबरदारी घेण्याचे व वाहतूक पोलिसांच्या सूचनांचे पालन करण्याचे आवाहन करण्यात आले आहे. गृहमंत्र्यांच्या दौऱ्यामुळे काही शाळांमध्ये सुटी जाहीर करण्यात आली आहे, तर काही शाळांची वेळ सकाळच्या सत्रात बदलण्यात आली आहे. यामुळे विद्यार्थ्यांना वाहतूक कोंडीचा त्रास होणार नाही, असे प्रशासनाने स्पष्ट केले आहे.

केंद्रीय गृहमंत्री अमित शाह यांच्या पुणे भेटीमुळे शहरात काही भागांत वाहतूक मार्गांमध्ये तात्पुरते बदल करण्यात आले आहेत. नागरिकांनी या काळात शांतता राखावी, अनावश्यक प्रवास टाळावा आणि प्रशासनाने दिलेल्या सूचनांचे पालन करून सहकार्य करावे.