हिमाचल प्रदेशात सुरू असलेल्या जोरदार पावसामुळे राज्यात पूर, भूस्खलन आणि ढगफुटीच्या घटनांनी थैमान घातले आहे. आतापर्यंत एकोणसत्तर जणांचा मृत्यू झाला असून सदतीस जण बेपत्ता असल्याची माहिती राज्य प्रशासनाने दिली आहे. पावसामुळे अनेक जिल्ह्यांमध्ये घरांचे, पुलांचे आणि वाहतुकीच्या मार्गांचे मोठ्या प्रमाणावर नुकसान झाले आहे.
मुसळधार पावसामुळे चारशेहून अधिक रस्ते बंद झाले आहेत. अनेक पुलं पूर्णपणे कोसळली असून, काही ठिकाणी रस्ते पाण्याखाली गेले आहेत. मंडी, कांगडा, कुल्लू, सिरमौर आणि शिमला हे जिल्हे सर्वाधिक प्रभावित झाले आहेत. रस्ते बंद झाल्याने अनेक गावांचा संपर्क तुटला आहे.
मंडी जिल्ह्यातील कारसोग, गोहार आणि थुनाग भागांत दहा पेक्षा अधिक ढगफुटीच्या घटना नोंदवण्यात आल्या. या घटनेत अनेक घरं वाहून गेली, गाड्या पाण्याच्या प्रवाहात लोपटल्या गेल्या आणि शेतीचेही मोठे नुकसान झाले आहे. काही ठिकाणी तर संपूर्ण वसाहतीच पाण्यात गाडल्या गेल्याचं चित्र दिसून आलं आहे.
या आपत्तीनंतर राष्ट्रीय आपत्ती निवारण आणि राज्य आपत्ती निवारण पथक यांच्या मदतीने हजारो नागरिकांचे सुरक्षित ठिकाणी स्थलांतर करण्यात आले आहे. मुख्यमंत्री सुखविंदर सिंग सुक्खू यांनी सर्व यंत्रणांना अलर्ट राहण्याचे आदेश दिले असून, स्थानिक प्रशासन तातडीने मदत व पुनर्वसन कार्यात गुंतले आहे.
भारतीय हवामान विभागाने हिमाचलमधील कांगडा, मंडी, शिमला, सिरमौर या जिल्ह्यांमध्ये सात जुलैपर्यंत मुसळधार पावसाचा इशारा दिला आहे. या पार्श्वभूमीवर “ऑरेंज अलर्ट” जाहीर करण्यात आला असून, नागरिकांना नद्यांच्या काठावर जाऊ नये, सुरक्षित स्थळी राहावे, असे आवाहन करण्यात आले आहे.
ही आपत्ती हिमालयीन भागातील हवामान बदलाचे गंभीर स्वरूप अधोरेखित करते. प्रशासनाचे प्रयत्न सुरू असले तरी, अशा आपत्तींसाठी दीर्घकालीन धोरणांची गरज निर्माण झाली आहे.
