स्वतंत्र बातमी

महाराष्ट्र शासनाने राज्यातील महिलांना स्वतःचा व्यवसाय, उद्योग किंवा उपजीविकेचे साधन सुरू करता यावे यासाठी अल्प व्याजदराने कर्ज देण्याचा महत्त्वपूर्ण निर्णय घेतला आहे. ‘मुख्यमंत्री माझी लाडकी बहीण’ या योजनेअंतर्गत महिलांना नऊ टक्के व्याजदराने कर्ज दिले जाणार आहे.

या निर्णयासाठी मुंबई येथे आयोजित बैठकीत मुख्यमंत्री एकनाथ शिंदे यांच्या उपस्थितीत योजना अंतिम करण्यात आली. या बैठकीस विविध आर्थिक विकास महामंडळे आणि मुंबई जिल्हा मध्यवर्ती सहकारी बँकेचे प्रतिनिधी उपस्थित होते.

योजनेअंतर्गत महिलांना वैयक्तिक तसेच सामूहिक स्वरूपात व्यवसायासाठी कर्ज दिले जाईल. सूक्ष्म, लघु व मध्यम उद्योग, घरगुती व्यवसाय, किराणा दुकान, शिवणकाम, हस्तकला, खाद्यपदार्थ निर्मिती आदी उपक्रमांसाठी या कर्जाचा वापर करता येईल.

मुंबई जिल्हा बँकेचे उपाध्यक्ष मिलिंद कांबळे यांनी सांगितले की, योजनेअंतर्गत महिलांना एक लाख रुपये किंवा त्याहून अधिक रकमेपर्यंत कर्ज नऊ टक्के व्याजदरात दिले जाणार आहे.

राज्यात मुंबई आणि उपनगरांमधील सुमारे सोळा लाख महिलांना या योजनेचा लाभ मिळू शकतो, असेही यावेळी सांगण्यात आले.