तापमानात काही अंशांनी वाढ

राज्यात पुढील काही दिवसांत हवेतील आर्द्रता आणि तापमान दोन्ही वाढण्याचा अंदाज वर्तवण्यात आला आहे. मान्सूनचा परतावा आणि स्थानिक पातळीवरील घडामोडी यामुळे वातावरणात हा बदल घडून आला आहे.

दिवाळीच्या काळात राज्यात दरवर्षी जाणवणारी गुलाबी थंडी यंदा गायब राहण्याची चिन्हे आहेत. प्रशांत महासागरातील ‘एल निनो’चा प्रभाव आणि स्थानिक पातळीवरील कमी दाबाच्या पट्ट्यांमधील बदल या स्थितीला कारणीभूत ठरत आहेत. कोकण, मध्य महाराष्ट्र, मराठवाडा आणि विदर्भातील काही भागांत किमान तापमान सरासरीपेक्षा ३ ते ४ अंशांनी अधिक नोंदवले गेले आहे. त्यामुळे दिवसा कडक ऊन आणि रात्रीही उकाडा अशी दुहेरी स्थिती निर्माण झाली आहे. हवामान खात्याच्या माहितीनुसार, पुढील ४८ तासांनंतर किमान तापमानात २ ते ४ अंशांनी घट दिसून येईल. वास्तविक थंडीचा कडाका अनुभवण्यासाठी नोव्हेंबरच्या दुसऱ्या पंधरवड्यापर्यंत वाट पाहावी लागेल. या हवामान बदलाचा थेट परिणाम आरोग्य आणि कृषी क्षेत्रावर होत आहे.