चीनने अरुणाचल प्रदेशच्या सीमेला लागून असलेल्या भागात ‘शार्प क्लॉ’ नावाची मानवरहित जमिनीवरील यंत्रणा तैनात केली आहे. ही यंत्रणा आधुनिक शस्त्रास्त्रांनी सज्ज असून, ७.६२ मिमी लाइट मशीन गन, कॅमेरे आणि इलेक्ट्रो-ऑप्टिकल उपकरणांनी युक्त आहे. डोंगराळ भागांमध्ये चालण्यासाठी आणि लक्ष्यावर अचूक निशाणा ठेवण्यासाठी या यंत्रणेचा वापर केला जातो.
शार्प क्लॉ-I ही यंत्रणा एकशे वीस किलो वजनाची असून ती सहा किमी अंतरावरून नियंत्रित करता येते. याच्याच पुढील पिढीचे मॉडेल शार्प क्लॉ-II मोठ्या क्षमतेचे असून, ते स्वतंत्रपणे कार्य करताना शार्प क्लॉ-I ला साथ देते. चीनच्या या कृतीमुळे सीमेवरील युद्धतंत्राचा धोका वाढतोय, आणि त्याचा थेट परिणाम भारताच्या पूर्वेकडील सीमारेषेवर होऊ शकतो.
या नव्या तंत्रज्ञानामुळे भारताच्या सैनिकी आणि सामरिक दृष्टिकोनातून नव्या आव्हानांना सामोरे जाण्याची वेळ आली आहे. चीनने आपली यूजीव्ही यंत्रणा प्रत्यक्ष नियंत्रण रेषेजवळ तैनात केल्याने, भारतीय लष्कर सतर्क झालं असून या भागातील हालचालींवर काटेकोर नजर ठेवली जात आहे. भारतीय गुप्तचर विभाग आणि लष्करी विश्लेषकांकडून या प्रकाराचे गांभीर्याने परीक्षण सुरू आहे.
भारतीय लष्कराने या पार्श्वभूमीवर सीमेवरील गस्त वाढवली असून, संरक्षण यंत्रणा अधिक सक्षम करण्यासाठी नव्या पावलं उचलण्याची तयारी सुरू केली आहे. भविष्यात युद्धसदृश स्थिती उद्भवल्यास त्याचा सामना करण्यासाठी भारताने तांत्रिकदृष्ट्या बळकट होण्याची गरज अधोरेखित झाली आहे. शत्रूपक्षाकडील या यंत्रणेच्या तैनातीमुळे सीमा तणाव अधिक वाढण्याची शक्यता निर्माण झाली आहे.
