स्वतंत्र बातमी

कोल्हापूर आणि मुंबई दरम्यान प्रवास करणाऱ्या प्रवाशांसाठी एक आनंदाची बातमी आहे. लवकरच या मार्गावर वंदे भारत एक्सप्रेस गाडी सुरू होणार असून, रेल्वे प्रशासनाने अंतिम तयारी सुरू केली आहे. सध्या कोल्हापूर ते पुणे मार्गावर धावणारी आठ डब्यांची मिनी वंदे भारत गाडी आता मुंबईपर्यंत वाढवण्यात येणार असल्याचे स्पष्ट झाले आहे. पुढील पंधरा दिवसांत ही सेवा सुरू होण्याची शक्यता आहे.

वंदे भारत ट्रेन ही जलदगती, अत्याधुनिक आणि आरामदायी प्रवासासाठी प्रसिद्ध आहे. वातानुकूलित डबे, स्वयंचलित दरवाजे, बायो टॉयलेट्स, वाय-फाय आणि सुरक्षेसाठी अत्याधुनिक प्रणाली असलेल्या या गाडीमुळे कोल्हापूर–मुंबई प्रवासात मोठा बदल होणार आहे. यामुळे प्रवासाचा वेळ लक्षणीय कमी होईल आणि प्रवाशांना अधिक सोयीस्कर अनुभव मिळेल.

ही सेवा सुरू करण्यासाठी कोल्हापूर, पुणे, मुंबई मार्गावरील प्रवाशांनी आणि जनप्रतिनिधींनी मागणी केली होती. खासदार धनंजय महाडिक आणि अन्य लोकप्रतिनिधींच्या पाठपुराव्याला यश मिळाले असून, रेल्वे सल्लागार समितीने या मार्गावर वंदे भारत सेवा सुरू करण्यास मान्यता दिली आहे. लवकरच या गाडीचे अधिकृत वेळापत्रक आणि भाडे जाहीर करण्यात येणार असून, कोकण आणि पश्चिम महाराष्ट्रातील नागरिकांसाठी ही सेवा एक मोलाची सुविधा ठरेल.