मुख्यमंत्री देवेंद्र फडणवीस यांनी येत्या गणेशोत्सवाच्या पार्श्वभूमीवर प्लास्टर ऑफ पॅरिस पासून तयार करण्यात येणाऱ्या गणेशमूर्तींच्या विसर्जनासाठी पर्यावरणपूरक धोरण तयार करण्याचे निर्देश प्रशासनाला दिले आहेत. या मूर्तींच्या विसर्जनामुळे जलप्रदूषण आणि पर्यावरणाला होणारे नुकसान लक्षात घेता शासनाने वेळेवर ठोस पावले उचलावीत, असे मुख्यमंत्र्यांनी स्पष्ट केले.
या अनुषंगाने राजीव गांधी विज्ञान व तंत्रज्ञान आयोगाच्या मदतीने तज्ञांकडून अहवाल मागवण्यात येणार आहे. या अहवालात प्लास्टर ऑफ पॅरिस मूर्तींसाठी खोल पाण्यात विसर्जन करण्याचे तसेच लहान मूर्तींसाठी कृत्रिम तलावांचा पर्याय सुचवला जाण्याची शक्यता आहे. याशिवाय, समुद्रकिनाऱ्यांवर विसर्जन झाल्यानंतर त्वरित स्वच्छता मोहिमा राबवाव्यात आणि पर्यावरण रक्षणासाठी उपाययोजना करण्यात याव्यात, असेही निर्देश देण्यात आले आहेत.
संस्कृती व जनसंपर्क मंत्री आशीष शेलार यांनीही पर्यावरणपूरक गणेशोत्सव साजरा करण्यावर भर देत शाडू मातीच्या मूर्तींचा प्रचार, नैसर्गिक रंगांचा वापर, आणि जनजागृतीसाठी विशेष मोहीम राबवण्याची गरज अधोरेखित केली. नागरिकांनीही यामध्ये पुढाकार घेऊन निसर्गपूरक पर्याय स्वीकारावेत, असे आवाहन करण्यात आले आहे.
या निर्णयाच्या अंमलबजावणीमुळे भविष्यात न्यायालयीन मार्गदर्शक तत्त्वांचे पालन करत धार्मिक उत्सवाचे पर्यावरणपूरक रूप टिकवण्यास मदत होईल. शासन या धोरणाला उच्च न्यायालयात सादर करणार असून, त्यानुसार संपूर्ण राज्यात एकसंध मार्गदर्शक धोरण राबवले जाण्याची शक्यता आहे.
