पाकिस्तानचे लष्करप्रमुख जनरल सय्यद असीम मुनीर लवकरच अमेरिकेच्या अधिकृत दौर्‍यावर जाणार असल्याची माहिती समोर आली आहे. पाकिस्तानच्या लष्कराकडून याबाबत अद्याप अधिकृत घोषणा करण्यात आलेली नसली, तरी माध्यमांमध्ये मिळालेल्या माहितीनुसार हा दौरा पुढील काही आठवड्यांत होण्याची शक्यता आहे.
या दौर्‍यात जनरल असीम मुनीर अमेरिकेच्या संरक्षण खात्याच्या वरिष्ठ अधिकाऱ्यांशी चर्चा करतील. दोन्ही देशांमधील संरक्षण सहकार्य, दहशतवादविरोधी उपाययोजना, तसेच प्रादेशिक सुरक्षेचे मुद्दे यावर चर्चा होण्याची शक्यता आहे.
पाकिस्तान आणि अमेरिकेमध्ये गेल्या काही वर्षांपासून संबंधात चढ-उतार होत असतानाच, हा दौरा दोन्ही देशांसाठी महत्त्वाचा मानला जात आहे. अमेरिकेच्या दौऱ्यात जनरल मुनीर यांची संरक्षण सचिवांसह आणि इतर लष्करी अधिकाऱ्यांसोबत द्विपक्षीय चर्चाही होण्याची शक्यता आहे.
हा दौरा अमेरिका आणि पाकिस्तान यांच्यातील लष्करी पातळीवरील संवाद वाढवण्याच्या दृष्टीने महत्त्वाचा ठरू शकतो, अशी चर्चा राजकीय आणि लष्करी वर्तुळात सुरू आहे.
