पुरी येथील श्रीजगन्नाथ मंदिरात दरवर्षीप्रमाणे यंदाही श्रीजगन्नाथांचा नवजौवन दर्शन व नेत्रोत्सव सोहळा अतिशय उत्साही वातावरणात आणि भक्तिभावाने साजरा करण्यात आला. देवतांच्या स्नानयात्रेनंतर काही दिवस विश्रांतीनंतर प्रथमच दर्शनासाठी मंदिराचे दरवाजे खुल्या करण्यात आले. हजारो भाविकांनी भावपूर्ण वातावरणात भगवान जगन्नाथ, बलभद्र आणि सुभद्रा यांचे दर्शन घेतले.
नवजौवन दर्शनाच्या एक दिवस आधी मंदिरात ‘नेत्रोत्सव’ म्हणजेच डोळ्यांच्या पूजनाचा विधी पार पडतो. यामध्ये देवतांच्या डोळ्यांवर विशेष रंगकाम केले जाते, ज्यामुळे त्यांचे रूप अधिक भावमय व तेजस्वी दिसते. ‘बनकालागी’ या विशेष शृंगार विधीद्वारे देवतांचे नवीन रूप सजवले जाते, आणि मगच नवजौवन दर्शनासाठी मंदिराचे दरवाजे उघडले जातात.
यंदा नवजौवन दर्शन आणि रथयात्रा एकाच दिवशी आल्यामुळे मंदिर प्रशासनाकडून दर्शनाची वेळ नियोजनबद्ध ठेवण्यात आली होती. पहाटे आठ ते नऊ वाजेपर्यंत विशेष दर्शनाचे आयोजन करण्यात आले होते, तर सकाळी नऊ ते साडेदहा वाजेपर्यंत सर्वसामान्य भाविकांसाठी दर्शन खुले होते. यासाठी तीन हजार तिकिटांचे वितरण करण्यात आले होते, आणि दक्षिणद्वार मार्गे दर्शनाची विशेष व्यवस्था करण्यात आली होती.
या उत्सवासाठी पुरी शहरात मोठ्या प्रमाणावर गर्दी व वाहतूक नियंत्रण करण्यात आले होते. सुमारे दहा हजार पोलिस कर्मचारी, दोनशे पंचाहत्तर सीसीटीव्ही कॅमेरे आणि ड्रोनच्या सहाय्याने संपूर्ण परिसराचे निरीक्षण करण्यात येत होते. विशेष नियंत्रण कक्ष कार्यरत होते आणि ‘बडा दंडा’ व ‘गुंडिचा मंदिर’ परिसरात सुरक्षेचा अधिक कडेकोट बंदोबस्त ठेवण्यात आला होता.
