तुर्की आणि ग्रीसच्या सीमेवर आज पहाटेच्या सुमारास जोरदार भूकंप झाला. रिश्टर स्केलवर या भूकंपाची तीव्रता ६.२ इतकी नोंदवली गेली असून, दोन्ही देशांमध्ये भूकंपाचे तीव्र धक्के जाणवले. भूकंपाचा केंद्रबिंदू तुर्कीतील आयव्हालिकजवळ असल्याचे प्राथमिक माहितीतून समोर आले आहे. यामुळे एजियन समुद्राच्या किनारी वसलेल्या अनेक भागांत घबराट उडाली. अनेक इमारती हलल्यामुळे नागरिक रस्त्यावर आले.
स्थानिक प्रशासनाकडून मिळालेल्या माहितीनुसार, काही ठिकाणी जुन्या इमारतींना तडे गेले असून, किरकोळ जखमींची नोंद आहे. जीवितहानीबाबत कोणतीही अधिकृत माहिती अद्याप मिळालेली नाही. तुर्की व ग्रीस दोन्ही देशांतील आपत्कालीन यंत्रणा सतर्क झाल्या असून, मदत आणि बचावकार्य सुरु करण्यात आले आहे. नागरिकांनी शांतता राखण्याचे आवाहन प्रशासनाकडून करण्यात आले आहे. अधिकृत भूकंप संशोधन संस्थांनी पुढील काही तास भूकंपाचे सौम्य झटके जाणवण्याची शक्यता वर्तवली आहे.
