जगप्रसिद्ध विद्युत वाहन उत्पादक टेस्ला कंपनीने अखेर भारतात अधिकृतपणे प्रवेश करण्याची तयारी सुरू केली आहे. येत्या जुलै महिन्यात टेस्लाचे पहिले शोरूम मुंबईच्या बांद्रा-कुर्ला संकुलात तर दुसरे दिल्लीच्या एअर सिटी भागात सुरू होणार आहे.
सुरुवातीला कंपनी चीनमधून आयात केलेल्या ‘मोडेल वाय’ गाड्यांची विक्री करणार आहे. या वाहनांचा पहिला साठा मुंबईत दाखल झाला असून त्यासोबत चार्जिंग यंत्रणा आणि इतर उपकरणेही आली आहेत.
मात्र, भारतात आयात शुल्क जास्त असल्याने टेस्लाच्या गाड्यांची किंमत अंदाजे छप्पन्न हजार अमेरिकन डॉलर सुमारे अठ्ठेचाळीस ते साठ लाख रुपये इतकी असणार आहे. ही किंमत भारतीय सामान्य ग्राहकांसाठी खूपच जास्त असल्याचे मानले जात आहे.
मुंबईत बांद्रा-कुर्ला येथील टेस्ला शोरूमसाठी सुमारे चार हजार चौरस फूट जागा पाच वर्षांसाठी भाड्याने घेण्यात आली असून त्याचे वार्षिक भाडे तीन कोटी ऐंशी लाख रुपये पासून सुरू होईल आणि दरवर्षी त्यात वाढ होणार आहे.
सध्या टेस्लाने भारतात उत्पादन सुरु करण्याऐवजी आयातित गाड्यांवर भर दिला आहे. सरकारकडून उत्पादनासाठी सवलत हवी असल्यास स्थानिक उत्पादनास प्राधान्य द्यावे लागेल, अशी भूमिका स्पष्ट करण्यात आली आहे.
युरोप, चीन आणि इतर बाजारपेठांतील विक्री घसरण्याच्या पार्श्वभूमीवर भारत आता टेस्लासाठी नव्या वाढीचा केंद्रबिंदू बनू शकतो, असा तज्ज्ञांचा अंदाज आहे.
