स्वतंत्र बातमी

मुंबई आणि नवी मुंबई दरम्यान जलद आणि पर्यावरणपूरक प्रवासासाठी महाराष्ट्र सरकारने नवीन वॉटर टॅक्सी सेवा सुरू करण्याची योजना आखली आहे. ही सेवा कोलाबा येथील रेडिओ क्लब जेटीपासून सुरू होऊन नवी मुंबई आंतरराष्ट्रीय विमानतळापर्यंत प्रवास सुलभ करेल. सध्या या प्रवासासाठी सुमारे साठ ते पंचहत्तर  मिनिटे लागतात, परंतु वॉटर टॅक्सीमुळे हा वेळ फक्त चाळीस मिनिटांपर्यंत मर्यादित राहील.

महाराष्ट्र बंदर विकास मंत्री नितेश राणे यांच्या अध्यक्षतेखालील बैठकीत या सेवेसंबंधी निर्णय घेण्यात आला. या बैठकीत संबंधित अधिकाऱ्यांना आवश्यक जेटींच्या बांधकामासाठी प्रस्ताव तयार करण्याचे निर्देश देण्यात आले. तसेच, विमानतळ प्राधिकरणाकडून आवश्यक परवानग्या मिळवण्याची प्रक्रिया सुरू करण्याचे आदेश देण्यात आले.

ही वॉटर टॅक्सी सेवा मुंबई वॉटर मेट्रो प्रकल्पाशी जोडण्याची योजना आहे, ज्यामुळे मुंबई महानगर प्रदेशातील प्रवास अधिक सुलभ आणि जलद होईल. या सेवेमुळे वाहतूक कोंडी कमी होईल, इंधन बचत होईल आणि पर्यावरणपूरक प्रवासाची सुविधा उपलब्ध होईल . या नवीन वॉटर टॅक्सी सेवेमुळे मुंबई आणि नवी मुंबई दरम्यानचा प्रवास अधिक सुलभ, जलद आणि पर्यावरणपूरक होणार आहे, ज्याचा फायदा प्रवाशांना आणि पर्यावरणाला होईल.