स्वतंत्र बातमी

नागपूरच्या वाढत्या विस्तार आणि लोकसंख्येचा विचार करता, शहरातील काही भागांमध्ये सुरक्षा आणि कायदा-सुव्यवस्थेच्या दृष्टीने नव्या पोलीस चौक्यांची गरज भासत होती. मुख्यमंत्री देवेंद्र फडणवीस यांनी दिलेल्या निर्देशानुसार शहरातील पाच ठिकाणी पोलीस चौक्यांची स्थापना करण्यात आली आहे. या उपक्रमामुळे नागपूर शहरातील सुरक्षितता अधिक मजबूत होणार असून वाहतूक सुरळीत राहील आणि अपघाताचे प्रमाणही कमी होईल, असा विश्वास पालकमंत्री चंद्रशेखर बावनकुळे यांनी व्यक्त केला.

पोलीस आयुक्त कार्यालयात झालेल्या कार्यक्रमात पालकमंत्री बावनकुळे यांच्या हस्ते या पाच पोलीस चौक्यांचे दूरदृष्य प्रणालीद्वारे उद्घाटन करण्यात आले. या प्रसंगी पोलीस आयुक्त रवींद्रकुमार सिंगल, सहपोलीस आयुक्त नवीनचंद्र रेड्डी, अपर पोलीस आयुक्त राजेंद्र दाभाडे, शिवाजी राठोड, पोलीस उपायुक्त लोहित मतानी, दीपक अग्रवाल आणि वरिष्ठ पोलीस अधिकारी उपस्थित होते. गणेशनगर, कोराडी, कापसी, जामठा, गोंडखैरी आणि उमरगाव या ठिकाणी या नवीन पोलीस चौक्यांची उभारणी करण्यात आली आहे.

पालकमंत्री चंद्रशेखर बावनकुळे म्हणाले की, “नागपूर शहर आता आंतरराष्ट्रीय दर्जाचे शहर म्हणून विकसित होत आहे. त्यामुळे सुरक्षिततेच्या दृष्टीने पोलीस विभागाची जबाबदारी अधिक वाढली आहे. नव्या चौक्यांमुळे स्थानिक पातळीवर गस्त वाढेल, गुन्हेगारीवर नियंत्रण मिळेल तसेच नागरिकांमध्ये सुरक्षिततेचा विश्वास निर्माण होईल.”

त्यांनी पुढे सांगितले की, “पोलीस विभागाने सुरू केलेल्या ‘यू-टर्न ऑपरेशन’मुळे वाहतूक अधिक सुरक्षित आणि शिस्तबद्ध होईल. या उपक्रमामुळे अपघातांचे प्रमाण घटण्यास मदत होईल आणि रस्ते प्रवास अधिक सोयीस्कर बनेल. सुरक्षित नागपूरसाठी युवकांचा सहभाग आवश्यक असून, पोलीस विभागाने ‘सुरक्षित नागपूर’ मोहिमेत नागरिकांचा आणि युवकांचा सक्रिय सहभाग वाढवावा,” असेही त्यांनी आवाहन केले.

कार्यक्रमाचे प्रास्ताविक वाहतूक पोलीस उपायुक्त लोहित मतानी यांनी केले. त्यांनी सांगितले की, “‘यू-टर्न ऑपरेशन’मुळे कायदा आणि सुव्यवस्था अधिक सक्षम होईल तसेच नागरिकांसाठी वाहतूक अधिक सुलभ बनेल. नव्या पोलीस चौक्यांमुळे शहरातील पोलीस उपस्थिती वाढेल आणि नागपूर अधिक सुरक्षित, शिस्तबद्ध आणि प्रगतिशील शहर म्हणून उभे राहील.”