अमेरिका आणि व्हेनेझुएला यांच्यातील तणाव पुन्हा एकदा तीव्र झाला आहे. अमेरिकेने व्हेनेझुएलाच्या काही लष्करी तळांवर हवाई हल्ला करण्याची तयारी सुरू केल्याची चर्चा सुरू असून, त्यामुळे जागतिक स्तरावर चिंता व्यक्त केली जात आहे. अमेरिकेच्या अधिकाऱ्यांनी म्हटले आहे की, या तळांचा वापर मादुरो सरकारशी संबंधित अमली पदार्थ तस्करी गटांकडून केला जात असल्याचा संशय आहे.
अमेरिकेच्या संरक्षण विभागानुसार, व्हेनेझुएलातून दरवर्षी लाखो किलो कोकेन दक्षिण अमेरिकेतून युरोप आणि उत्तर अमेरिकेकडे पाठवले जाते. हे अंमली पदार्थ कार्टेल व्हेनेझुएलाच्या लष्करी संरक्षणाखाली काम करत असल्याचे अमेरिकेचे म्हणणे आहे. त्यामुळे या तळांवर निशाणा साधण्याचा विचार करण्यात येत आहे.
दरम्यान, व्हाइट हाऊसने यावर औपचारिक भूमिका स्पष्ट करताना सांगितले की, लष्करी कारवाईबाबत कोणताही अंतिम निर्णय घेतलेला नाही. मात्र, व्हेनेझुएलामध्ये मानवाधिकारांचे उल्लंघन आणि आंतरराष्ट्रीय कायद्यांचे उल्लंघन होत असल्याचे अमेरिकेचे मत आहे. त्यामुळे आवश्यक वाटल्यास निर्णायक कारवाई केली जाऊ शकते, असे संकेत प्रशासनाने दिले आहेत.
दुसरीकडे, व्हेनेझुएलाचे राष्ट्राध्यक्ष निकोलस मादुरो यांनी अमेरिकेच्या इशाऱ्याला थेट प्रत्युत्तर दिले आहे. त्यांनी म्हटले की, “अमेरिकेने आमच्या सीमांवर आक्रमण करण्याचा प्रयत्न केल्यास आम्ही ठामपणे प्रतिकार करू. आमचा देश सार्वभौम आहे आणि कोणत्याही बाह्य दबावाला झुकणार नाही.” मादुरो सरकारने अमेरिकेवर राजकीय हस्तक्षेप आणि आर्थिक नाकेबंदीचे आरोप पुन्हा केले आहेत.
या तणावामुळे संपूर्ण दक्षिण अमेरिकेत अस्थिरता निर्माण होण्याची भीती तज्ज्ञांनी व्यक्त केली आहे. या प्रदेशातील अनेक देशांनी शांततेचे आवाहन करत, दोन्ही राष्ट्रांनी संवादाद्वारे प्रश्न सोडवावा, असे म्हटले आहे. मात्र, परिस्थिती जसजशी विकसित होत आहे, तसतसे अमेरिका आणि व्हेनेझुएला यांच्यातील संघर्षाचे ढग अधिक गडद होताना दिसत आहेत.
