स्वतंत्र बातमी

ठाणे–बेलापूर महामार्ग हा नवी मुंबईतील औद्योगिक व व्यावसायिक क्षेत्राला जोडणारा सर्वात महत्त्वाचा मार्ग मानला जातो. मात्र, गेल्या काही वर्षांत या मार्गावर वाहतूक प्रचंड वाढल्याने दररोज कोंडी, वेळेचा अपव्यय आणि अपघातांची मालिका सुरू होती. या सर्व परिस्थितीचा विचार करून ठाणे महानगरपालिका आणि महाराष्ट्र राज्य रस्ते विकास महामंडळाने संयुक्तपणे आठशे एकोणनव्वद कोटी रुपयांचा मोठा पायाभूत प्रकल्प हाती घेतला आहे. या अंतर्गत या मार्गावर तीन नवे उड्डाणपूल उभारले जाणार आहेत.

हा प्रकल्प पूर्ण झाल्यानंतर ठाणे–बेलापूर मार्गावरील प्रवाशांना व वाहनचालकांना मोठा दिलासा मिळणार असून, या परिसरातील औद्योगिक क्षेत्र आणि व्यावसायिक दळणवळणाचा नवा प्रवास सुरू होईल, अशी अपेक्षा आहे. एरोली सेक्टर दहा जवळील औद्योगिक क्षेत्रातील वाहतूक सुलभ करण्यासाठी, घनसोली परिसरात  महत्त्वाच्या चौकातील सिग्नल कोंडी टाळण्यासाठी तसेच मिलेनियम बिझनेस पार्क परिसरात दैनंदिन कार्यालयीन प्रवास सुलभ करण्यासाठी या उड्डाणपूलाची मदत होईल.

या तिन्ही ठिकाणी दररोज हजारो गाड्यांची वर्दळ असते. सकाळी व संध्याकाळी कामाच्या वेळेत याठिकाणी मोठ्या प्रमाणात वाहतूक कोंडी होत असते. या सर्व ठिकाणी उड्डाणपूल बांधल्याने वाहनांची वाहतूक सिग्नल-मुक्त, सुरक्षित आणि जलद होईल. या संपूर्ण प्रकल्पासाठी अंदाजे आठशे एकोणनव्वद कोटी रुपयांचा खर्च अपेक्षित आहे. यात रस्त्याचा रुंदीकरण, सिग्नल-मुक्त चौक, जलवाहिनी व निचरा व्यवस्थेची सुधारणा, तसेच सार्वजनिक सुविधा यांचा समावेश असेल. निधीचा भार ठाणे महानगरपालिका आणि महाराष्ट्र राज्य रस्ते विकास महामंडळ दोघांवर विभागला जाणार आहे. कामाचा कालावधी दोन वर्षांचा ठरवण्यात आला असून, पहिला टप्पा २०२६ पर्यंत पूर्ण करण्याचे उद्दिष्ट ठेवण्यात आले आहे.

ठाणे-बेलापूर रोडवर गेल्या काही वर्षांत औद्योगिक तसेच व्यावसायिक वाहतूक मोठ्या प्रमाणात वाढली आहे. खासकरुन, नवी मुंबईतील ऐरोली, घणसोली, महापे, टीटीसी औद्योगिक क्षेत्र आणि बेलापूरपर्यंत रोज शेकडो ट्रक, अवजड वाहनं तसेच प्रवासी वाहनं या मार्गावरून ये-जा करतात. मात्र, रस्त्याची रुंदी मर्यादित असल्यामुळे आणि सिग्नलचे प्रमाण जास्त असल्यामुळे दररोज प्रचंड वाहतूक कोंडी निर्माण होते. या मार्गावर सरासरी प्रवासाचा वेग पंधरा ते वीस किलोमीटर प्रति तासांपर्यंत घटला आहे. यामुळे प्रवाशांचा वेळ आणि इंधन दोन्ही वाया जात आहे.

या नवीन प्रकल्पामुळे ठाणे-बेलापूर रोड परिसरातील रहिवाशांना व प्रवाशांना थेट फायदे होणार आहेत. सध्याचा पंचेचाळीस मिनिटांचा प्रवास सुमारे पंधरा ते वीस मिनिटांपर्यंत कमी होईल. वाहतूक सुलभ झाल्याने इंधन खर्चात बचत होईल. तसेच सिग्नल-मुक्त मार्गांमुळे अपघातांची शक्यता कमी होईल. मालवाहतूकीची कार्यक्षमता वाढेल. स्थानिक अर्थव्यवस्थेला चालना मिळेल.

हा मार्ग भविष्यात केवळ औद्योगिक क्षेत्रापुरता मर्यादित राहणार नाही, तर नवी मुंबईच्या नागरी विकासाचा नवा धागा ठरणार आहे. उड्डाणपूलांमुळे वाहतूक सुलभ होईलच, पण या मार्गावरील स्मार्ट सिटी प्रकल्प, आयटी पार्क आणि निवासी संकुले यांना देखील मोठा फायदा होईल. हा प्रकल्प केवळ वाहतूक सुलभ करणार नाही तर परिसराच्या आर्थिक, सामाजिक आणि पर्यावरणीय विकासालाही नवा वेग देईल.