युरोपमध्ये सध्या कडाक्याची थंडी आणि गोठवणारा पाऊस यामुळे जनजीवन विस्कळीत झाले आहे. मध्य आणि पूर्व युरोपमधील अनेक प्रमुख विमानतळ तात्पुरते बंद करावे लागले असून शेकडो विमानांचे उड्डाण रद्द किंवा वळवण्यात आले आहे. ऑस्ट्रिया, झेक प्रजासत्ताक, हंगेरी आणि स्लोव्हाकिया या देशांना याचा सर्वाधिक फटका बसला आहे.
मंगळवारी सकाळी व्हिएन्ना विमानतळाच्या धावपट्ट्यांवर बर्फाचा जाड थर साचल्याने विमानतळ काही काळासाठी पूर्णपणे बंद करण्यात आले होते. विमानतळ प्रशासनाने दिलेल्या माहितीनुसार, धावपट्टीवरील बर्फ हटवल्यानंतरही तापमान अत्यंत कमी असल्याने तो पुन्हा पुन्हा गोठत होता. यामुळे सुरक्षेच्या कारणास्तव सकाळी अकरा वाजेपर्यंत सर्व उड्डाणे स्थगित करण्यात आली होती. अनेक विमाने म्युनिक, फ्रँकफर्ट आणि कोलोन यांसारख्या शहरांकडे वळवण्यात आली. झेक प्रजासत्ताकची राजधानी प्राग येथील व्हाक्लाव हावेल विमानतळावरही ‘फ्रीझिंग रेन’मुळे भीषण स्थिती निर्माण झाली. विमानतळ पूर्णपणे बंद झाले नसले तरी, ते अत्यंत मर्यादित स्वरूपात सुरू होते. धावपट्टीवरून बर्फ काढण्याचे काम सुरू असताना तासाला केवळ दोन ते सहा विमानांनाच उतरण्याची परवानगी दिली जात होती, ज्यामुळे विमानांचे वेळापत्रक कोलमडले. हंगेरीमधील बुडापेस्ट आणि स्लोव्हाकियामधील ब्रातिस्लाव्हा विमानतळही मंगळवारी सकाळी काही तासांसाठी बंद ठेवण्यात आले होते. रस्त्यावर दिसणारा पारदर्शक बर्फाचा थर जो अत्यंत घसरडा असतो, यामुळे धावपट्ट्यांवर विमाने उतरवणे अशक्य झाले होते.
यावेळच्या हवामानाचे वैशिष्ट्य म्हणजे केवळ बर्फ पडत नसून फ्रीझिंग रेन होत आहे. हा पाऊस द्रव स्वरूपात पडतो, पण अत्यंत थंड पृष्ठभागाच्या संपर्कात येताच त्याचे त्वरित बर्फात रूपांतर होते. यामुळे विमानतळावर विमानांचे टायर घसरण्याची भीती असते आणि विमानांच्या पंखांवर बर्फाचा जाड थर साचतो, जो उड्डाणासाठी घातक ठरू शकतो. केवळ विमान वाहतूकच नाही, तर रस्ते आणि रेल्वे प्रवासावरही मोठा परिणाम झाला आहे. ऑस्ट्रियाच्या सरकारी रेल्वे कंपनीने प्रवाशांना अत्यावश्यक कामाशिवाय प्रवास न करण्याचे आवाहन केले आहे. अनेक रेल्वे गाड्या रद्द करण्यात आल्या असून, मुख्य स्थानकांवर प्रवाशांची मोठी गर्दी जमली आहे. झेक प्रजासत्ताक आणि हंगेरीमध्ये निसरड्या रस्त्यांमुळे अनेक अपघात झाले आहेत. प्रागमध्ये पन्नासहून अधिक लोक घसरून पडल्याने जखमी झाले आहेत.
या अनपेक्षित हवामानामुळे हजारो पर्यटक युरोपमधील विविध विमानतळांवर अडकून पडले आहेत. हॉटेल बुकिंग आणि पुढील प्रवासाचे नियोजन कोलमडल्याने प्रवाशांमध्ये नाराजी आहे. विमान कंपन्यांनी प्रवाशांना विमानतळावर येण्यापूर्वी आपल्या विमानाची स्थिती तपासण्याचा सल्ला दिला आहे.
