स्वतंत्र बातमी

सलग आलेल्या सुट्ट्यांमुळे मुंबई-पुणे द्रुतगती मार्गावर शनिवारी सकाळपासूनच प्रचंड वाहतूक कोंडी पाहायला मिळाली. लोणावळा आणि खंडाळा घाट परिसरात वाहनांच्या पाच ते सात किलोमीटरपर्यंत लांबच लांब रांगा लागल्या होत्या, ज्यामुळे प्रवाशांना तासनतास एकाच ठिकाणी थांबून राहावे लागले.

जानेवारी महिन्यातील शेवटचा आठवडा आणि त्याला जोडून आलेली प्रजासत्ताक दिनाची सुट्टी यामुळे नोकरदार वर्ग आणि व्यावसायिक वर्गाला सलग तीन ते चार दिवसांची सुट्टी मिळाली आहे. या संधीचा फायदा घेत मुंबई आणि ठाणे परिसरातील हजारो नागरिक महाबळेश्वर, पाचगणी, लोणावळा आणि कोकणाकडे रवाना झाले आहेत. एकाच वेळी हजारो गाड्या रस्त्यावर आल्याने द्रुतगती मार्गावर वाहतुक कोंडी निर्माण झाली. सर्वात जास्त कोंडी ही बोरघाट परिसरात पाहायला मिळाली. घाटातील चढणीच्या मार्गावर गाड्यांचा वेग कमी झाल्याने मागे वाहनांच्या रांगा साचत गेल्या. मुंबईकडून पुण्याच्या दिशेला जाणाऱ्या लेनवर खालापूर टोल नाक्याजवळ वाहनांची मोठी गर्दी होती. फास्टॅग असूनही वाहनांची संख्या इतकी जास्त होती की, टोल प्रशासनाला गर्दी नियंत्रित करणे कठीण गेले. अमृतांजन पूल परिसरातही वळणावळणाच्या रस्त्यामुळे वाहतूक कमी वेगाने सुरू होती.

उन्हाचा तडाखा आणि त्यातच वाहतूक कोंडीत अडकल्यामुळे लहान मुले आणि ज्येष्ठ नागरिकांचे प्रचंड हाल झाले. दोन तासांचा प्रवास पूर्ण करण्यासाठी पाच तास लागत आहेत, अशी तक्रार अनेक वाहनचालकांनी केली. परिस्थिती हाताळण्यासाठी महामार्ग पोलीस आणि आयआरबीच्या पथकाने अधिक पथके तैनात केली आहेत. वाहतूक पोलिसांनी प्रवाशांना शक्य असल्यास जुना मुंबई-पुणे हायवे वापरावा असे आवाहन केले आहे. यासोबतच लेनची शिस्त पाळावी, जेणेकरून ओव्हरटेकिंगमुळे होणारी अधिकची कोंडी टाळता येईल. दुपारी किंवा सायंकाळी प्रवास करण्याऐवजी पहाटे लवकर प्रवास सुरू करावा, अशा सूचना दिल्या आहेत.