उत्तर महाराष्ट्रातील अनेक जिल्ह्यांना बुधवारी पहाटे अवकाळी पावसाने झोडपून काढले आहे. विशेषतः नाशिकमधील निफाड आणि जळगावमधील भुसावळ व चोपडा तालुक्यांत जोरदार गारपीट झाली आहे. ऐन काढणीच्या हंगामात आलेल्या या नैसर्गिक संकटामुळे रब्बी पिकांचे आणि फळबागांचे अतोनात नुकसान झाले आहे. निफाड तालुक्यात पावसाचा जोर सर्वाधिक होता. सध्या द्राक्ष काढणीचा हंगाम जोमात आहे. मात्र, अचानक आलेल्या गारपिटीमुळे द्राक्ष मणी फुटणे आणि गळण्याचे प्रकार घडले आहेत. यामुळे निर्यातक्षम द्राक्षांचे मोठे नुकसान झाले असून द्राक्ष उत्पादक शेतकरी हवालदिल झाला आहे. गारपिटीमुळे शेतात उभा असलेला गहू लोळला असून, काढणीला आलेल्या उन्हाळ कांद्याच्या पातीचेही नुकसान झाले आहे.
जळगाव जिल्ह्यातील चोपडा आणि भुसावळ पट्ट्यात वादळी वाऱ्यासह झालेल्या पावसामुळे मोठे नुकसान झाले आहे. वादळी वाऱ्याचा वेग इतका प्रचंड होता की, भुसावळ आणि चोपडा परिसरात अनेक ठिकाणी केळीच्या बागा पूर्णपणे भुईसपाट झाल्या आहेत. केळीच्या झाडांचे खांब मोडून पडल्याने शेतकऱ्यांचे लाखो रुपयांचे भांडवल मातीत गेले आहे. चोपडा परिसरात बोराच्या आकाराच्या गारा पडल्यामुळे रब्बी मका आणि ज्वारीच्या पिकांचे पाने फाटली असून पिकांचे मोठे नुकसान झाले आहे. या अवकाळी पावसामुळे केवळ पिकेच गेली नाहीत, तर पुढील काही दिवस शेतकऱ्यांसमोर नवीन संकटे उभी ठाकली आहेत. ढगाळ वातावरण आणि पावसामुळे पिकांवर डाऊनी आणि भुरी सारख्या रोगांचा प्रादुर्भाव वाढण्याची शक्यता निर्माण झाली आहे. शेतात पाणी साचल्यामुळे गहू आणि हरभरा कापणीची कामे थांबली आहेत. ओलावा वाढल्यामुळे धान्याचा दर्जा घसरण्याची आणि बुरशी लागण्याची भीती आहे. अवकाळीच्या या संकटानंतर स्थानिक लोकप्रतिनिधी आणि शेतकऱ्यांनी तातडीने नुकसानीचे पंचनामे करण्याची मागणी केली आहे. महसूल विभागाने तलाठ्यांना बांधावर जाऊन नुकसानीचा अंदाज घेण्याचे निर्देश दिले आहेत. गारपिटीचा जोर पाहता नुकसानीचा आकडा मोठा असण्याची शक्यता वर्तवण्यात येत आहे.
उत्तर महाराष्ट्रात पुढील चोवीस तास ढगाळ वातावरण आणि काही ठिकाणी विखुरलेल्या स्वरूपात पावसाची शक्यता कायम असल्याचे म्हटले आहे. शेतकऱ्यांनी आपला शेतीमाल सुरक्षित ठिकाणी झाकून ठेवावा आणि काढणी केलेली पिके सुरक्षित स्थळी हलवावीत, असे आवाहन हवामान विभागाने केले आहे.
