स्वतंत्र बातमी

मुंबईतील वांद्रे पूर्व रेल्वे स्थानकावरचा स्कायवॉक खुला करण्यात आला आहे. यामुळे वांद्रे-कुर्ला संकुल, म्हाडा कार्यालय आणि जिल्हाधिकारी कार्यालयाकडे जाणाऱ्या हजारो पादचाऱ्यांना दिलासा मिळाला आहे. मुंबई उच्च न्यायालयाच्या कठोर भूमिकेनंतर आणि महापालिकेने केलेल्या वेगवान पाठपुराव्यानंतर हा प्रकल्प पूर्णत्वास आला आहे.

महानगरपालिकेने बांधलेला हा नवीन स्कायवॉक आधुनिक तंत्रज्ञान आणि प्रवाशांच्या सोयींचा विचार करून तयार करण्यात आला आहे. हा स्कायवॉक रेल्वे स्थानकाच्या नवीन बारा मीटर रुंद पादचारी पुलाला थेट जोडण्यात आला असल्याने प्रवाशांना स्थानकातून थेट स्कायवॉकवर येणे शक्य झाले आहे. पादचाऱ्यांना विविध ठिकाणी उतरण्यासाठी आणि चढण्यासाठी चार जिने देण्यात आले आहेत. वयोवृद्ध आणि दिव्यांग नागरिकांच्या सोयीसाठी या स्कायवॉकवर दोन स्वयंचलित सरकते जिने बसवण्यात आले आहेत. संपूर्ण स्कायवॉकवर देखरेख ठेवण्यासाठी चौदा हाय-डेफिनिशन सीसीटीव्ही कॅमेरे बसवण्यात आले आहेत. हा प्रकल्प उच्च प्रतीच्या आणि दीर्घकाळ टिकणाऱ्या साहित्याचा वापर करून बांधण्यात आला आहे.

वांद्रे पूर्व रेल्वे स्थानकाबाहेर अनधिकृत रिक्षांची गर्दी, अरुंद रस्ते आणि वाहनांची प्रचंड वर्दळ यामुळे पादचाऱ्यांना कलानगर किंवा म्हाडा कार्यालयापर्यंत जाण्यासाठी कसरत करावी लागत असे. जुना स्कायवॉक धोकादायक ठरल्याने २०१९ मध्ये बंद करून २०२१ मध्ये पाडण्यात आला होता. तेव्हापासून नागरिक रस्त्यावरून जीव मुठीत धरून चालत होते. आता हा नवीन स्कायवॉक सुरू झाल्यामुळे अनंत काणेकर मार्गावरील पादचाऱ्यांची गर्दी लक्षणीयरीत्या कमी होईल आणि नागरिकांना सुरक्षितरीत्या मार्गक्रमण करता येईल. या प्रकल्पाच्या कामात बराच विलंब झाला होता, ज्याची दखल मुंबई उच्च न्यायालयाने घेतली होती. एका ज्येष्ठ नागरिकाने दाखल केलेल्या याचिकेवर सुनावणी करताना न्यायालयाने महापालिकेच्या सुस्त कारभारावर ताशेरे ओढले होते. त्यानंतर महापालिकेने कामाचा वेग वाढवला. पश्चिम द्रुतगती महामार्गावरील जड वाहतूक आणि रात्रीच्या वेळी कामासाठी मिळणारा कमी वेळ अशा आव्हानांवर मात करत महापालिकेने हे काम पूर्ण केले.