स्वतंत्र बातमी

वर्धा: राज्यातील शिक्षक भरतीची प्रतीक्षा करणाऱ्या लाखो उमेदवारांसाठी एक दिलासादायक बातमी समोर आली आहे. महाराष्ट्र राज्य शिक्षण आयुक्तालयाने पवित्र पोर्टलद्वारे राबवल्या जाणाऱ्या पदभरती प्रक्रियेला वेग दिला आहे. सर्व स्थानिक स्वराज्य संस्था आणि खासगी शैक्षणिक संस्थांना रिक्त पदांच्या जाहिराती प्रसिद्ध करण्यासाठी १ मे ते ३१ मे २०२६ हा कालावधी निश्चित करून दिला आहे. शिक्षण आयुक्तांनी या निश्चित मुदतीत जाहिरातींची कार्यवाही पूर्ण करण्याचे कडक आदेश संबंधित संस्थांना दिले आहेत.

पूर्वी काही खासगी संस्थाचालक स्वत:च्या स्तरावर भरती प्रक्रिया राबवत असत, ज्यावर अनेक आक्षेप नोंदवले गेले होते. मात्र, आता ही संपूर्ण प्रक्रिया पारदर्शक करण्यासाठी पवित्र पोर्टलचा अवलंब केला जात आहे. डी.एड. आणि बी.एड. धारक उमेदवारांना या निर्णयामुळे दिलासा मिळाला असून, गुणवत्ताधारक शिक्षकांची निवड होण्यास मदत होणार आहे

उमेदवारांनी पोर्टलला भेट देण्याचे आवाहन

शिक्षण आयुक्त सचिन्द्र प्रताप सिंह यांनी दिलेल्या निर्देशानुसार, मे महिन्याचा कालावधी हा जाहिरातींसाठी राखीव असेल. रिक्त पदांची माहिती पोर्टलवर उपलब्ध करून देणे हा या वेळापत्रकाचा मुख्य भाग आहे. उमेदवारांनी भरती संदर्भातील अद्ययावत माहितीसाठी वेळोवेळी पोर्टलला भेट द्यावी, असे आवाहन करण्यात आले आहे.

टीएआयटी परीक्षेचा संदर्भ आणि नोंदणी

या भरतीसाठी २७ मे ते ५ जून २०२५ दरम्यान शिक्षक अभियोग्यता व बुद्धिमत्ता चाचणी घेण्यात आली होती. या परीक्षेसाठी दोन लाख अठ्ठावीस हजार आठशे आठ उमेदवारांनी नोंदणी केली होती, ज्यापैकी दोन लाख अकरा हजार तीनशे आठ उमेदवार प्रत्यक्ष परीक्षेस बसले होते. या परीक्षेचा निकाल १८ ऑगस्ट २०२५ रोजी जाहीर झाला असून, याच निकालाच्या आधारे पुढील भरती प्रक्रिया पार पडणार आहे.

स्व-प्रमाणपत्र आणि पात्रता पडताळणी

भरती प्रक्रियेचा एक महत्त्वाचा टप्पा म्हणून उमेदवारांना स्व-प्रमाणपत्र]पूर्ण करण्यासाठी १५ डिसेंबर २०२५ ते १५ जानेवारी २०२६ पर्यंतची मुदत देण्यात आली होती. या कालावधीत एक लाख सत्तर हजार एकशे आठ उमेदवारांनी आपले स्व-प्रमाणपत्र यशस्वीरित्या पूर्ण केले आहे. या माहितीच्या आधारे आता पोर्टलच्या माध्यमातून पात्रता पडताळणीचे पुढील टप्पे पार पडतील.

रिक्त पदांचा आढावा व पारदर्शकता

शैक्षणिक वर्ष २०२५-२६ च्या संचमान्यतेनुसार राज्यातील प्राथमिक, माध्यमिक आणि उच्च माध्यमिक शाळांमधील रिक्त पदांचा आढावा घेण्यात आला आहे. मे २०२६ अखेरपर्यंत रिक्त होणारी संभाव्य पदे विचारात घेऊन ही भरती केली जाणार आहे. नियुक्ती प्राधिकाऱ्यांना रिक्त पदांच्या ऐंशी टक्के मर्यादेत मागणी नोंदवण्याचे निर्देश दिले आहेत. तसेच, अतिरिक्त शिक्षकांचे समायोजन ३१ मार्च २०२६ पर्यंत पूर्ण करण्याच्या सूचनाही देण्यात आल्या होत्या.

या संपूर्ण प्रक्रियेचा मूळ उद्देश उमेदवारांना समान संधी देणे आणि राज्यातील अनुदानित, विनाअनुदानित व रात्र शाळांमधील शिक्षकांचा तुटवडा दूर करणे हा आहे.

टॅग्ज: #शिक्षकभरती #पवित्रपोर्टल #महाराष्ट्र #शिक्षण #TAIT #teacherrecruitment #education #maharashtra #schools #pavitraportal