झी मराठी वाहिनीवरील अत्यंत लोकप्रिय आणि गूढ मालिका ‘देवमाणूस-मधला अध्याय’ सध्या प्रेक्षकांच्या उत्कंठेला शिगेला पोहोचवत आहे. पैशाचा हव्यास, थरारक गुन्हेगारी आणि मानवी स्वार्थाचे भयानक वास्तव दाखवणारी ही मालिका प्रत्येक भागात नवा ट्विस्ट आणत असते. आता या मालिकेच्या कथानकात प्रेक्षकांचा अत्यंत आवडता आणि जुना महत्त्वाचा चेहरा परतत आहे, तो चेहरा म्हणजेच डिंपल. अभिनेत्री अस्मिता देशमुख हिची डिंपल म्हणून झालेली ही खतरनाक एंट्री गोपाळ उर्फ डॉक्टर अजितकुमारच्या संपूर्ण आयुष्यात एकच मोठी खळबळ उडवून देणार आहे.
झी मराठी वाहिनीने नुकताच सोशल मीडियावर या संदर्भातील एक अत्यंत रोमांचक प्रोमो शेअर केला असून, हा प्रोमो पाहून सोशल मीडियावर चाहत्यांनी कौतुकाचा आणि आनंदाचा वर्षाव सुरू केला आहे. या जबरदस्त ट्विस्टमुळे आता मालिकेची रंजकतेची पातळी आणखी वाढली असून प्रेक्षक पुढील भागाची आतुरतेने वाट पाहत आहेत.
नवीन प्रोमोमध्ये असे पाहायला मिळते की, गोपाळ आणि लाली एका जुन्या मंदिरात उभे आहेत. लाली अतिशय श्रद्धेने गोपाळच्या हातावर एक पवित्र गंडा बांधताना म्हणते की, ‘हा गंडा परक्या बायकांपासून तुमचं रक्षण करेल.’ यावर गोपाळ मनातल्या मनात स्वतःशीच म्हणतो की, ‘एवढ्या बायकांचा गुंता सोडवला पण हिने माझाच गुंता केला.’ ते दोघे देवासमोर हात जोडून ‘आता आमच्या संसाराला कुणाची नजर नको लागू दे’ अशी प्रार्थना करत असतानाच अचानक तिथे डिंपल येते. ती थेट गोपाळला ‘डॉक्टर’ अशी जुनी हाक मारते आणि धावत जाऊन त्याला घट्ट मिठी मारते. डिंपलला अचानक समोर पाहून गोपाळच्या पायाखालची जमीनच सरकते, तर लाली आश्चर्यचकित होऊन पाहते. लाली वैतागून विचार करते की, ‘भटक्या नवऱ्याला कितीही शिकवलं तरी येडं बनून पेढाच खाणार.’
‘देवमाणूस’ आणि ‘देवमाणूस २’ या दोन्ही आधीच्या भागांमध्ये डॉक्टर अजितकुमारच्या सर्व कट कारस्थानात आणि खुनांमध्ये डिंपलने मुख्य साथ दिली होती, इतकेच नाही तर तिने त्याच्याशी लग्नही केले होते. त्यामुळे तिला डॉक्टर अजितकुमारचे सर्व काळे कारनामे आणि रहस्ये ठाऊक आहेत. डिंपलच्या या आगमनामुळे सोशल मीडियावर नेटकऱ्यांमध्ये प्रचंड उत्सुकता आणि आनंदाचे वातावरण निर्माण झाले आहे. हे पाहणे येणाऱ्या भागात रंजक ठरणार आहे. ही नवीन घडामोड मालिकेला एका वेगळ्या उंचीवर घेऊन जाईल यात शंका नाही.