जपानमध्ये बुधवारी संध्याकाळी नोडा सिटी परिसरात सहा रिश्टर स्केल तीव्रतेचा भूकंप झाला. संयुक्त राज्य भूवैज्ञानिक सर्वेक्षणाने दिलेल्या माहितीनुसार, नोडा शहराच्या पूर्वेला एक्याण्णव किलोमीटर अंतरावर भूकंपाचा धक्का जाणावला.
जपानच्या संस्थेच्या मते, भूकंपाची तीव्रता रिश्टर स्केलवर सहा पूर्णांक एक इतकी होती. भूकंपाचा केंद्रबिंदू नोटो द्वीपकल्पाजवळ जमिनीच्या खाली सुमारे दहा किलोमीटर खोलीवर होता. केंद्रबिंदू कमी खोलीवर असल्यामुळे धक्के अत्यंत तीव्र होते आणि ते लांब अंतरापर्यंत जाणवले. ३१ डिसेंबरची संध्याकाळ असल्याने जपानमधील सार्वजनिक ठिकाणे, प्रार्थनास्थळे आणि मॉल्समध्ये मोठी गर्दी होती. भूकंपाचे धक्के जाणवताच लोक इमारतींमधून बाहेर मोकळ्या जागेत धावले. नवीन वर्षाच्या सुट्ट्यांसाठी जपानमध्ये आलेल्या विदेशी पर्यटकांमध्ये या घटनेमुळे प्रचंड भीतीचे वातावरण निर्माण झाले.
भूकंपानंतर लगेचच जपान सरकारने समुद्रकिनाऱ्यावरील भागांसाठी त्सुनामीचा इशारा दिला होता. समुद्रकिनाऱ्यावर एक मीटर उंचीच्या लाटा धडकण्याची शक्यता वर्तवण्यात आली होती. खबरदारीचा उपाय म्हणून किनारपट्टीवरील नागरिकांना उंचावर असलेल्या ठिकाणी किंवा सुरक्षित आश्रयस्थानांमध्ये जाण्याचे आवाहन करण्यात आले. सुदैवाने, कोणतीही मोठी विनाशकारी लाट आल्याची नोंद झालेली नाही. प्राथमिक माहितीनुसार, या भूकंपामुळे काही जुन्या इमारतींच्या भिंतींना तडे गेले आहेत, तर काही ठिकाणी काचा फुटल्याच्या घटना घडल्या आहेत. खबरदारी म्हणून काही भागांतील बुलेट ट्रेन सेवा तात्पुरती थांबवण्यात आली होती. रुळांची तपासणी केल्यानंतरच सेवा पुन्हा सुरू करण्याचा निर्णय घेण्यात आला. काही हजार घरांचा वीज पुरवठा काही काळासाठी खंडित झाला होता. मात्र, जपानमधील प्रगत आपत्कालीन यंत्रणेमुळे दुरुस्तीचे काम वेगाने सुरू करण्यात आले. भूकंपाच्या धक्क्यानंतर शिकिका आणि काशीवाझाकी-कारिवा अणुऊर्जा केंद्रांची तातडीने तपासणी करण्यात आली. सुदैवाने, कोणत्याही केंद्रात किरणोत्सर्गाचा धोका किंवा तांत्रिक बिघाड झालेला नाही, असे अणुऊर्जा नियामक प्राधिकरणाने स्पष्ट केले आहे.
जपान हा देश भूकंपासाठी अत्यंत संवेदनशील असून, तेथील नागरिक अशा परिस्थितीसाठी नेहमी सज्ज असतात. मात्र, नवीन वर्षाच्या पूर्वसंध्येला झालेल्या या भूकंपाने आनंदाच्या वातावरणावर विरजण घातले आहे. जपान सरकारने नागरिकांना पुढील काही तास सावध राहण्याचे आवाहन केले आहे.
