राज्यातील समुद्रकिनाऱ्यावरील सर्व मच्छीमारांना सध्या सतर्क राहण्याचा इशारा देण्यात आला आहे. भारतीय हवामान विभागाच्या माहितीनुसार, पश्चिम किनारपट्टीवर 29 ऑक्टोबर 2025 या कालावधीत कमी दाबाचा पट्टा निर्माण झाला आहे. त्यामुळे किनारपट्टी भागात हवामानात बदल होऊन जोरदार वारे वाहण्याची शक्यता वर्तविण्यात आली आहे.
हवामान खात्याच्या अंदाजानुसार, या कालावधीत वाऱ्याचा वेग तेहतीस ते पंचेचाळीस किलोमीटर प्रतितासपर्यंत राहू शकतो. काही ठिकाणी हा वेग पंचावन्न किलोमीटर प्रतितासपर्यंत जाऊ शकतो. त्यामुळे समुद्र खवळलेला राहील आणि लाटांची तीव्रता वाढेल, अशी शक्यता व्यक्त करण्यात आली आहे.
या पार्श्वभूमीवर भारतीय हवामान विभाग आणि भारतीय तटरक्षक दलाने सर्व मच्छीमारांना पुढील काही दिवस समुद्रात न जाण्याचा इशारा दिला आहे. सध्या समुद्रात असलेल्या नौकांनी शक्य तितक्या लवकर परत बंदरात यावे आणि कोणत्याही परिस्थितीत समुद्रात जाण्याचा धोका पत्करू नये, असे स्पष्टपणे सांगण्यात आले आहे.
तटरक्षक दल आणि हवामान खात्याने किनारपट्टीवरील स्थानिक प्रशासन, बंदर अधिकारी तसेच मच्छीमार संघटनांना सतर्क राहण्याचे निर्देश दिले आहेत. हवामानात होणाऱ्या बदलांची माहिती सातत्याने घेत राहावी आणि मच्छीमारांना वेळोवेळी सावध करण्यात यावे, असेही सूचित करण्यात आले आहे.
समुद्रात असलेल्या सर्व मासेमारी नौकांनी तात्काळ सुरक्षितपणे बंदरात परत यावे, स्थानिक बंदर अधिकाऱ्यांशी संपर्क ठेवावा आणि हवामान खात्याच्या सूचनांचे काटेकोर पालन करावे, असे आवाहन प्रशासनाकडून करण्यात आले आहे. राज्य शासनानेही आपत्ती व्यवस्थापन यंत्रणांना सतर्क राहण्याचे निर्देश दिले असून, परिस्थितीवर बारकाईने लक्ष ठेवण्यात येत आहे.
