स्वतंत्र बातमी

राज्यातील अंगणवाडी सेविका आणि मदतनिसांना यंदाच्या दिवाळीत शासनाने जाहीर केलेली भेट अद्याप मिळालेली नाही. शासनाच्या आदेशानुसार प्रत्येक सेविका आणि मदतनिसेला दोन हजार रुपयांची ‘भाऊबीज भेट’ देण्यात येणार होती. मात्र ही रक्कम ‘व्हर्च्युअल पर्सनल डिपॉझिट अकाउंट’ या नव्या प्रणालीद्वारे पाठविण्याची व्यवस्था केल्याने निधी खात्यांपर्यंत पोहोचण्यात उशीर झाला आहे.

छत्रपती संभाजीनगर जिल्ह्यात सध्या एकूण तीन हजार चारशे चाळीस अंगणवाडी सेविका आणि तितक्याच मदतनिसा कार्यरत आहेत. या सर्वांसाठी शासनाकडून एक कोटी सोळा लाख चौदा हजार रुपये इतका निधी 13  ऑक्टोबर 2025 रोजी विभागीय कार्यालयाकडे वर्ग करण्यात आला होता. निधी उपलब्ध असूनही वितरणात उशीर झाल्याने अनेक सेविका नाराज आहेत.

महिलांच्या बँक खात्यांमध्ये थेट रक्कम जमा करण्याऐवजी ‘व्हीपीडीए’ प्रणालीद्वारे निधी पाठविण्याची ही पहिलीच वेळ आहे. या नव्या पद्धतीत खात्याची मंजुरी, नोंदणी आणि पडताळणी अशा अनेक टप्प्यांमुळे व्यवहारात अडथळे निर्माण झाले आहेत. काही खात्यांत माहिती अपूर्ण असल्याने किंवा तांत्रिक त्रुटीमुळे व्यवहार अपयशी ठरले आहेत.

या प्रकरणाबाबत बालविकास प्रकल्प अधिकाऱ्यांनी सांगितले की, “निधी पूर्णपणे प्राप्त झाला आहे, मात्र ‘व्हीपीडीए’ प्रणालीतील तांत्रिक त्रुटीमुळे वितरणात विलंब झाला. समस्या दूर करण्याचे काम सुरू असून, काही दिवसांत सर्व सेविकांना त्यांच्या खात्यात रक्कम जमा होईल.” अधिकाऱ्यांच्या म्हणण्यानुसार, पुढील काळात अशा तांत्रिक अडचणी टाळण्यासाठी प्रक्रिया सुलभ करण्यात येईल.

दरम्यान, अनेक अंगणवाडी सेविका आणि मदतनिसांनी दिवाळीपूर्वी भेट न मिळाल्याने नाराजी व्यक्त केली आहे. त्यांनी प्रशासनाकडे लेखी तक्रारी नोंदवल्या असून, वेळेत भेट न मिळणे हा अन्याय असल्याचे म्हटले आहे. सेविका आणि मदतनिसा ग्रामीण भागात बालक, गर्भवती माता आणि महिलांसाठी सातत्याने काम करतात. त्यामुळे शासनाने त्यांचा सन्मान राखत वेळेत भेट मिळावी, अशी मागणी त्यांनी केली आहे.