स्वतंत्र बातमी

बृहन्मुंबई महानगरपालिकेने ‘फिट इंडिया मिशन’च्या धर्तीवर ‘फिट मुंबई’ हे नवे आरोग्य अभियान सुरू केले आहे. या उपक्रमाचा शुभारंभ 25 ऑक्टोबर 2025 रोजी करण्यात आला. या मोहिमेचा उद्देश म्हणजे मुंबईकरांनी आपल्या दैनंदिन जीवनात शारीरिक तंदुरुस्तीला प्राधान्य द्यावे आणि आरोग्यदायी सवयी अंगीकाराव्यात. या अभियानाचा मुख्य संदेश आहे तो म्हणजे “फिटनेस दिल से!”

महापालिकेने या अभियानाअंतर्गत शहरभरातील नागरिकांसाठी समुद्रकिनाऱ्यावर सायकलसाठी स्वतंत्र मार्ग आणि नागरिकांसाठी धावण्याचा पथ तयार करण्यात आला आहे तसेच मोकळी व्यायामस्थळे आणि योगाभ्यास केंद्रांची व्यवस्था करण्यास सुरुवात केली आहे. प्रत्येक प्रभागात नागरिकांसाठी विनामूल्य व्यायाम, चालणे, धावणे आणि योगाचे कार्यक्रम आयोजित करण्याचे नियोजन आहे. विशेष म्हणजे या उपक्रमात अनेक सामाजिक संस्था, स्थानिक क्लब आणि व्यायाम मार्गदर्शक स्वेच्छेने सहभागी झाले आहेत.

महापालिकेच्या म्हणण्यानुसार, या उपक्रमाद्वारे प्रत्येक आठवड्याच्या शनिवारी “फिट शनिवार” म्हणून साजरा केला जाईल. त्या दिवशी मुंबईतील नागरिकांनी सकाळी आपल्या परिसरातील बागा, समुद्रकिनारे किंवा मैदाने येथे जाऊन शारीरिक क्रियाकलाप करावेत, असे आवाहन करण्यात आले आहे. यामुळे शहरातील नागरिकांमध्ये आरोग्याबद्दल जागरूकता निर्माण होईल आणि सामूहिक सहभागाची सवय लागेल.

‘फिट मुंबई’ मोहिमेचा आणखी एक महत्त्वाचा भाग म्हणजे शालेय आणि महाविद्यालयीन विद्यार्थ्यांना यात सहभागी करून घेणे. लहानपणापासूनच नियमित व्यायाम, योग आणि क्रीडाशिक्षण या गोष्टींचे महत्त्व समजावे, या हेतूने महापालिकेने शिक्षण विभागासह विशेष कार्यक्रम राबवण्याचे ठरवले आहे. यामुळे युवकांमध्ये मानसिक आणि शारीरिक सुदृढतेची भावना वाढवण्यास मदत होईल.

महानगरपालिकेच्या अधिकाऱ्यांनी सांगितले की, या मोहिमेमुळे मुंबईकरांची जीवनशैली अधिक आरोग्यपूर्ण बनेल, तणाव कमी होईल आणि नागरिकांमधील सामाजिक संवादही वाढेल. नियमित व्यायामाची सवय लागल्याने आरोग्य खर्चात बचत होईल आणि शहराचा एकंदर आरोग्यदर्शक निर्देशांक उंचावेल. ‘फिट मुंबई’ हा उपक्रम म्हणजे आरोग्यपूर्ण आणि तंदुरुस्त मुंबईकडे टाकलेले एक ठोस पाऊल आहे.