स्वतंत्र बातमी

रत्नागिरी जिल्ह्यात गेल्या काही दिवसांपासून मुसळधार पावसाने हाहाकार माजवला आहे. समुद्र खवळल्याने मच्छीमारीसाठी समुद्रात जाणे धोकादायक ठरले आहे. त्यामुळे जिल्ह्यातील सागरी किनाऱ्यावरील मच्छीमारांनी आपली नौका किनाऱ्यावरच थांबवून ठेवली आहेत. अरबी समुद्रात निर्माण झालेल्या कमी दाबाच्या क्षेत्रामुळे ‘मोंथा’ नावाचे चक्रीवादळ तयार होण्याची शक्यता हवामान खात्याने व्यक्त केली आहे. परिणामी प्रशासनाने मच्छीमारांना खोल समुद्रात न जाण्याचा इशारा दिला असून, त्यामुळे संपूर्ण मच्छीमारी उद्योग ठप्प झाला आहे.

या अचानक आलेल्या वादळसदृश हवामानामुळे रत्नागिरी जिल्ह्यातील मच्छीमारांच्या रोजीरोटीवर गदा आली आहे. अनेक दिवसांपासून मच्छीमारी थांबली असल्याने बाजारात ताज्या माशांची टंचाई निर्माण झाली आहे. सूरमई, बांगडा, पापलेट अशा लोकप्रिय माशांचे दर दुप्पट-तिपटीने वाढले आहेत. पूर्वी तीनशे पन्नास ते चारशे रुपयांत मिळणारी सूरमई आता आठशे रुपयांच्या पुढे विकली जात आहे. सामान्य ग्राहकांसाठी मासे घेणे परवडत नाही, तर मच्छीमारांना विक्रीतून मिळणारा नफा पूर्णपणे थांबला आहे.

किनाऱ्यावर शेकडो नौका थांबून असल्याने त्यांचे दुरुस्तीचे काम, देखभाल आणि बंदरातील हालचालीही ठप्प झाल्या आहेत. मच्छीमार कामगार, मजूर आणि बोटमालक यांच्यावर आर्थिक संकट ओढवले आहे. “पाऊस कमी होईपर्यंत आणि वादळाचा धोका संपेपर्यंत आम्ही काही करू शकत नाही. बोट समुद्रात नेली तर जीव धोक्यात येईल” असे एका स्थानिक मच्छीमाराने सांगितले आहे.

स्थानिक प्रशासन आणि हवामान विभागाने समुद्रकिनाऱ्यांवर सतर्कता वाढवली आहे. नागरिकांना समुद्रकिनारी जाणे टाळण्याचे आवाहन करण्यात आले आहे. दरम्यान, रत्नागिरीसह संपूर्ण कोकण किनारपट्टीवर पुढील काही दिवस मुसळधार पावसाचा अंदाज व्यक्त करण्यात आला आहे.

वादळी पाऊस आणि चक्रीवादळाच्या या भीतीमुळे रत्नागिरीतील मच्छीमारी व्यवसायाला मोठा फटका बसला आहे. कोट्यवधी रुपयांचा व्यापार ठप्प झाल्याने अनेक कुटुंबांची उपजीविका संकटात सापडली आहे. हवामान सामान्य झाल्यावरच हा पारंपरिक व्यवसाय पुन्हा सुरू होऊ शकेल, अशी आशा मच्छीमार व्यक्त करत आहेत.