भारत आणि जर्मनी यांच्यातील राजनैतिक संबंधांना पंच्याहत्तर वर्षे आणि धोरणात्मक भागीदारीला पंचवीस वर्षे पूर्ण होत असल्याच्या ऐतिहासिक पार्श्वभूमीवर, जर्मनीचे चॅन्सलर फ्रेडरिक मर्झ दोन दिवसांच्या भारत दौऱ्यावर आले आहेत. चॅन्सलर झाल्यानंतरचा त्यांचा हा पहिलाच आशिया दौरा असून, अहमदाबाद आणि गांधीनगर येथे पंतप्रधान नरेंद्र मोदी आणि चॅन्सलर मर्झ यांच्यात अत्यंत महत्त्वपूर्ण आणि सौहार्दपूर्ण चर्चा पार पडली. या भेटीत दोन्ही देशांनी संरक्षण, तंत्रज्ञान आणि व्यापार या क्षेत्रांत अमर्याद सहकार्य करण्याचा निर्धार व्यक्त केला आहे.
चॅन्सलर मर्झ यांच्या दौऱ्याची सुरुवात अत्यंत उत्साहात झाली. पंतप्रधान मोदी यांनी त्यांचे अहमदाबाद विमानतळावर स्वागत केले. त्यानंतर दोन्ही नेत्यांनी साबरमती आश्रमाला भेट देऊन महात्मा गांधींना आदरांजली वाहिली. विशेष म्हणजे, मकरसंक्रांतीच्या पार्श्वभूमीवर दोन्ही नेत्यांनी साबरमती रिव्हरफ्रंटवर आंतरराष्ट्रीय पतंग महोत्सवात सहभाग घेतला. या सांस्कृतिक संवादानंतर गांधीनगरमधील महात्मा मंदिर येथे दोन्ही देशांच्या शिष्टमंडळ स्तरावर औपचारिक चर्चा झाली. या भेटीचा सर्वात महत्त्वाचा केंद्रबिंदू संरक्षण सहकार्य हा होता. भारतीय नौदलासाठी सहा अत्याधुनिक पी- पंच्याहत्तर आय श्रेणीतील पाणबुड्यांच्या खरेदीबाबतच्या प्रस्तावावर यावेळी सविस्तर चर्चा झाली. हा करार अंदाजे बानव्व हजार पाचशे कोटी रुपयांचा असून, जर्मनीची थायसेनक्रुप मरीन सिस्टम्स आणि भारताची ‘माझगाव डॉक शिपबिल्डर्स’ यांच्यात या प्रकल्पासाठी भागीदारी होण्याची दाट शक्यता आहे. पंतप्रधान मोदींनी स्पष्ट केले की, भारत आणि जर्मनी केवळ खरेदी-विक्रीपुरते मर्यादित न राहता संरक्षण उपकरणांच्या सह-उत्पादनावर भर देतील. इंडो-पॅसिफिक क्षेत्रात शांतता आणि स्थिरता राखण्यासाठी दोन्ही देशांनी कन्सल्टेशन मेकॅनिझम सुरू करण्याचा निर्णय घेतला आहे.
दोन्ही देशांनी अर्थव्यवस्था आणि तंत्रज्ञान क्षेत्रात एकूण एकोणवीस सामंजस्य करारांवर स्वाक्षऱ्या केल्या. यामध्ये पुढील क्षेत्रांचा समावेश आहे. जागतिक पुरवठा साखळी मजबूत करण्यासाठी दोन्ही देशांनी सेमीकंडक्टर परिसंस्था विकसित करण्याचे ठरवले आहे. हवामान बदलाच्या आव्हानांना तोंड देण्यासाठी ‘ग्रीन हायड्रोजन’ आणि शाश्वत ऊर्जा प्रकल्पांवर भर दिला जाईल. भारतीय विद्यार्थ्यांना जर्मनीमध्ये शिक्षणासाठी आणि रोजगारासाठी अधिक संधी उपलब्ध करून देण्याबाबत करार करण्यात आले. या दौऱ्यातील एक मोठी घोषणा म्हणजे, भारतीय पासपोर्ट धारकांसाठी जर्मनीमार्गे प्रवास करताना आता ट्रान्झिट व्हिसाची आवश्यकता नसेल. यामुळे युरोप आणि अमेरिकेला जाणाऱ्या हजारो भारतीय प्रवाशांचा वेळ आणि पैसे वाचणार आहेत. पंतप्रधान मोदी आणि चॅन्सलर मर्झ यांनी युक्रेन युद्ध, पश्चिम आशियातील तणाव आणि दहशतवाद या मुद्द्यांवरही चर्चा केली. दोन्ही नेत्यांनी रशिया-युक्रेन युद्धावर शांततेने तोडगा काढण्याचे आवाहन केले.
