स्वतंत्र बातमी

पुणे जिल्ह्यातील पेरणे फाटा, कोरेगाव भीमा येथील विजयस्तंभ अभिवादन सोहळ्यानिमित्त १ जानेवारी २०२६ रोजी होणाऱ्या कार्यक्रमासाठी प्रशासनाने आणि पोलिसांनी कडेकोट बंदोबस्त तैनात केला आहे. यासोबतच वाहतूक व्यवस्थेत मोठे बदल करण्यात आले आहेत. डॉ. बाबासाहेब आंबेडकर यांनी विजयस्तंभाला दिलेल्या भेटीचे हे शताब्दी वर्ष असल्याने यंदा अनुयायांची संख्या वीस लाखांहून अधिक असण्याची शक्यता आहे.

पुणे-नगर महामार्गावरील वाहतूक कोंडी टाळण्यासाठी ३१ डिसेंबरच्या दुपारपासूनच महत्त्वाचे बदल करण्यात आले आहेत. जड वाहनांना शिक्रापूर ते चाकण आणि पुणे ते नगर या मार्गावर बंदी घालण्यात आली असून पर्यायी मार्ग सुचवण्यात आले आहेत. अनुयायांच्या वाहनांसाठी लोणीकंद, पेरणे आणि तुळापूर फाटा परिसरात बावीस पेक्षा जास्त भव्य पार्किंग झोन निश्चित करण्यात आले आहेत. पार्किंगपासून विजयस्तंभापर्यंत जाण्यासाठी मोफत बस सुविधा उपलब्ध करून देण्यात आली आहे.

यावर्षी सुरक्षितता आणि शांतता राखण्यासाठी पुणे शहर आणि ग्रामीण पोलिसांनी एकत्रितपणे व्यापक नियोजन केले आहे. या सोहळ्यासाठी सुमारे तेरा हजारापेक्षा जास्त पोलीस अधिकारी आणि कर्मचारी तैनात करण्यात आले आहेत. यामध्ये पोलीस आयुक्त, अपर पोलीस महासंचालक, अनेक पोलीस उपायुक्त आणि सहायक आयुक्त स्तरावरील अधिकारी स्वतः बंदोबस्तावर लक्ष ठेवणार आहेत. राज्य राखीव पोलीस दल, जलद कृती दल, आणि बॉम्ब शोधक व नाशक पथक तैनात करण्यात आले आहेत. पोलिसांच्या मदतीसाठी एक हजारांहून अधिक होमगार्ड्सची नियुक्ती करण्यात आली आहे. सुरक्षेसाठी पहिल्यांदाच अत्याधुनिक तंत्रज्ञानाचा वापर केला जात आहे. गर्दीवर लक्ष ठेवण्यासाठी आणि संशयास्पद हालचाली शोधण्यासाठी फेस-स्कॅनिंग तंत्रज्ञान असलेल्या ड्रोनचा वापर केला जाणार आहे. विजयस्तंभ परिसर आणि मुख्य महामार्गावर दोनशेहून अधिक सीसीटीव्ही कॅमेरे बसवण्यात आले आहेत. संपूर्ण परिसरात उंच पोलीस टॉवर्स उभारण्यात आले आहेत, जिथून गर्दीचे नियंत्रण करणे सोपे जाईल.

शिरूर आणि आजूबाजूच्या परिसरात बिबट्यांचा वावर वाढल्याने, प्रशासनाने यंदा वन विभागाची मदत घेतली आहे. गर्दीच्या ठिकाणी बिबट्या येऊ नये म्हणून ठिकठिकाणी पिंजरे लावणे, सायरन वाजवणे आणि रात्रीच्या वेळी गस्त घालण्याचे नियोजन करण्यात आले आहे. पुणे पोलीस आयुक्त अमितेश कुमार यांनी नागरिकांना आवाहन केले आहे की, सोशल मीडियावरील कोणत्याही अफवांवर विश्वास ठेवू नये. अफवा पसरवणाऱ्यांवर सायबर पोलिसांचे बारीक लक्ष असून, व्हॉट्सॲप ग्रुप ॲडमिन्सना आधीच नोटीस बजावण्यात आल्या आहेत.