देशाची राजधानी दिल्ली आणि परिसरात प्रदूषणाची पातळी अतिधोकादायक स्तरावर पोहोचली आहे. सोमवारी दिल्लीतील हवेच्या गुणवत्तेचा निर्देशांक चारशेच्या पुढे नोंदवला गेल्याने संपूर्ण शहरात धुरक्याचे जाड थर पसरले आहेत. याच जोडीला पडलेल्या दाट धुक्यामुळे दृश्यमानता शून्यावर आल्याने रेल्वे आणि विमान वाहतुकीचा मोठा खोळंबा झाला आहे. या पार्श्वभूमीवर केंद्र सरकार आणि विविध विमान कंपन्यांनी प्रवाशांसाठी मार्गदर्शक सूचना केल्या आहेत.
गेल्या काही दिवसांपासून दिल्ली-एनसीआरमधील प्रदूषणात सातत्याने वाढ होत आहे. सोमवारी सकाळी अनेक भागांत चारशे पन्नासच्या आसपास नोंदवण्यात आला. हवेचा वेग मंदावल्यामुळे आणि थंडीच्या कडाक्यामुळे प्रदूषणाचे कण हवेतच साचून राहिले आहेत. यामुळे नागरिकांना श्वास घेण्यास त्रास होणे, डोळ्यांची जळजळ होणे आणि घशात खवखव होणे अशा तक्रारी जाणवत आहेत. आरोग्य तज्ज्ञांनी लहान मुले आणि ज्येष्ठांना घराबाहेर न पडण्याचा सल्ला दिला आहे.
दाट धुक्यामुळे दिल्लीतील इंदिरा गांधी आंतरराष्ट्रीय विमानतळावरील कामकाजावर मोठा परिणाम झाला आहे. दृश्यमानता कमी असल्यामुळे अनेक विमानांचे उड्डाण लांबणीवर टाकण्यात आले, तर काही विमाने इतर शहरांकडे वळवण्यात आली. दिल्लीहून सुटणाऱ्या आणि दिल्लीला येणाऱ्या अशा सुमारे शंभरहून अधिक विमानांवर याचा परिणाम झाला आहे. इंडिगो, एअर इंडिया आणि स्पाईसजेट सारख्या प्रमुख कंपन्यांनी प्रवाशांना विमानतळावर येण्यापूर्वी आपल्या फ्लाइटचे स्टेटस तपासावे, असे आवाहन केले आहे. धुक्याचा फटका रेल्वेलाही बसला असून, उत्तर भारताकडे जाणाऱ्या तीस ते चाळीस गाड्या आपल्या नियोजित वेळेपेक्षा तीन ते दहा तास उशिराने धावत आहेत.
वाढत्या प्रदूषणाला रोखण्यासाठी सरकारने ग्रेडेड रिस्पॉन्स ॲक्शन प्लॅन अंतर्गत कडक निर्बंध लागू केले आहेत. यामध्ये अनावश्यक बांधकामे आणि पाडकाम पूर्णपणे थांबवण्यात आले आहे, काही भागांत प्राथमिक शाळा ऑनलाइन चालवण्याचे निर्देश देण्यात आले आहेत, जुन्या डिझेल वाहनांच्या वाहतुकीवर बंदी आणली असून ट्रकला दिल्लीत येण्यास मर्यादित प्रवेश दिला जात आहे. भारतीय हवामान विभागाने दिलेल्या माहितीनुसार, येत्या दोन-तीन दिवसांत उत्तर भारतात दाट धुक्याची स्थिती कायम राहील. पंजाब, हरियाणा, राजस्थान आणि उत्तर प्रदेशातही रेड आणि ऑरेंज अलर्ट जारी करण्यात आला आहे. धुक्यामुळे रस्ते अपघातांचे प्रमाण वाढण्याची शक्यता असल्याने महामार्गांवर वाहन चालवताना वेग मर्यादित ठेवण्याच्या सूचना पोलिसांनी दिल्या आहेत.
