स्वतंत्र बातमी

पालघर जिल्ह्यातील बोईसरमध्ये असलेल्या तारापूर अणुऊर्जा प्रकल्पातील युनिट क्रमांक तीन हे चार नोव्हेंबरच्या मध्यरात्रीपासून साठ दिवसांसाठी बंद करण्यात आले आहे. या काळात या युनिटमध्ये नियोजित देखभाल आणि दुरुस्तीचे काम करण्यात येणार आहे. त्यामुळे महाराष्ट्र आणि गुजरात या दोन राज्यांना एकूण दोनशे सत्तर मेगावॅट विजेचा तात्पुरता तुटवडा भासण्याची शक्यता वर्तवली जात आहे.

तारापूर अणुऊर्जा केंद्राचे मुख्य प्रबंधक अशोक शिंदे यांनी सांगितले की, युनिट-तीनमध्ये मागील काही महिन्यांपासून काही तांत्रिक तपासण्या सुरू होत्या. अणुऊर्जा केंद्रातील सुरक्षितता, उत्पादन कार्यक्षमता आणि उपकरणांची स्थिरता टिकवण्यासाठी दर दोन वर्षांनी प्रत्येक युनिटचे मोठे तांत्रिक निरीक्षण आणि देखभाल आवश्यक असते. त्या अनुषंगाने यावर्षी युनिट क्रमांक तीन हे बंद ठेवले गेले आहे.

या काळात टर्बाइन, जनरेटर, कूलिंग सिस्टम आणि नियंत्रण प्रणालींचे तपशीलवार निरीक्षण करण्यात येईल. तसेच काही महत्वाच्या सुरक्षा प्रणालींमध्ये सुधारणा केली जाणार आहे. ही प्रक्रिया अत्यंत काटेकोरपणे व आंतरराष्ट्रीय मानकांनुसार पार पाडली जाणार असल्याचे अधिकाऱ्यांनी स्पष्ट केले आहे. तारापूर अणुऊर्जा केंद्रामध्ये सध्या दोन प्रमुख युनिट्स आहेत. युनिट तीन आणि युनिट चार हे प्रत्येकी दोनशे सत्तर मेगावॅट क्षमतेची वीज निर्मित करतात. या दोन युनिट्समधून एकत्रितपणे पाचशे चाळीस मेगावॅट वीज उत्पादन होते. यापैकी एक युनिट बंद झाल्याने उत्पादनात सुमारे पन्नास टक्क्यांची घट होणार आहे. महाराष्ट्र राज्य वीज वितरण कंपनी आणि गुजरात राज्य वीज वितरण कंपनी या दोन्ही संस्थांना या युनिटमधून वीज पुरवठा केला जातो.

महावितरणकडून सांगण्यात आले की, हा तुटवडा भरून काढण्यासाठी आम्ही पर्यायी ऊर्जा स्त्रोत वापरण्याचा प्रयत्न करत आहोत. राज्यातील जलविद्युत आणि थर्मल केंद्रांमधील अतिरिक्त क्षमता वापरून वीज पुरवठा सुरळीत ठेवला जाईल. नागरिकांना लोडशेडिंगचा त्रास होणार नाही.

अणुऊर्जा प्रकल्पाची ही दुरुस्ती नेमकी थंडीच्या हंगामात केली जात आहे. कारण या काळात विजेची मागणी तुलनेने कमी असते. उन्हाळ्याच्या तुलनेत घरगुती आणि औद्योगिक वीजवापर घटतो, त्यामुळे दुरुस्तीमुळे होणारा परिणाम राज्यावर फारसा जाणवणार नाही. याच कारणास्तव तारापूर प्रकल्प प्रशासनाने या काळात देखभाल करण्याचा निर्णय घेतला आहे.