स्वतंत्र बातमी

पुणे शहर आणि परिसराचा वाढता विस्तार, औद्योगिकीकरण आणि पायाभूत सुविधांचा विकास लक्षात घेता, पुरंदर येथील प्रस्तावित आंतरराष्ट्रीय विमानतळ हे शहराच्या भविष्यातील गरजा पूर्ण करण्यासाठी अत्यंत महत्त्वाचे ठरेल, असे मत मुख्यमंत्री देवेंद्र फडणवीस यांनी व्यक्त केले आहे. मुख्यमंत्र्यांनी महाराष्ट्र औद्योगिक विकास महामंडळ आणि संबंधित जिल्हा प्रशासनाला पुरंदर विमानतळासाठीची भूसंपादन प्रक्रिया एका निश्चित कालमर्यादेत पूर्ण करण्याचे कडक निर्देश दिले आहेत. सध्या या विमानतळासाठी आवश्यक असलेल्या एक हजार दोनशे सोळा हेक्टर जमिनीची संयुक्त मोजणी सुरू आहे. ही मोजणी लवकरात लवकर पूर्ण करून त्याबाबतचा अहवाल आणि त्यावर आलेल्या हरकतींचा सविस्तर माहिती शासनाला सादर करण्यास त्यांनी सांगितले आहे. विमानतळ प्रकल्पासाठी लागणाऱ्या निधीची उपलब्धता आणि त्यासंदर्भातील आर्थिक आराखडा  स्पष्ट असणे आवश्यक आहे. या प्रकल्पाच्या भूसंपादनासाठी सुमारे सहा हजार कोटी रुपयांची आवश्यकता भासणार आहे. हा निधी हुडको किंवा अन्य वित्तीय संस्थांकडून कर्जाच्या माध्यमातून उभारण्याबाबतचा प्रस्ताव तयार करून तो दहा फेब्रुवारी २०२६ रोजी होणाऱ्या पुढील मंत्रिमंडळ बैठकीत सादर करण्याचे आदेश मुख्यमंत्र्यांनी मुख्य सचिवांना दिले आहेत.

पुरंदर विमानतळासाठी पुणे जिल्ह्यातील सात गावांमधील जमीन संपादित केली जाणार आहे. यामध्ये वनपुरी, कुंभारवळण, उदाचीवाडी, एकतपूर, मुंजवडी, खानवडी, पारगाव या गावांचा समावेश आहे.  शेतकऱ्यांच्या जमिनीचा मोबदला देताना तो जास्तीत जास्त आणि समाधानकारक असावा, यावर मुख्यमंत्र्यांनी जोर दिला आहे. केवळ रेडी रेकनर दरांवर अवलंबून न राहता वाटाघाटी करून अधिक मोबदला देण्याबाबत शासन सकारात्मक आहे. तसेच, येथील प्रकल्पग्रस्तांच्या मुलांसाठी कौशल्य विकास केंद्र आणि नोकऱ्यांमध्ये शंभर टक्के प्राधान्य देण्याचे आश्वासनही त्यांनी दिले आहे.

मुख्यमंत्र्यांनी स्पष्ट केले की, पुरंदर विमानतळ हे केवळ प्रवासी वाहतुकीचे केंद्र नसून ते एक मोठे मालवाहतूक केंद्र म्हणून विकसित केले जाईल. यामुळे पुण्याचा जीडीपी किमान दोन टक्क्यांनी वाढण्याची शक्यता आहे. विमानतळ पूर्ण झाल्यानंतर आसपासचा संपूर्ण परिसर एक विकास क्षेत्र म्हणून गणला जाईल. या परिसराचा नियोजनबद्ध विकास करण्यासाठी सिडकोला आतापासूनच जमिनीची उपलब्धता आणि नियोजनाचे काम पाहण्याचे निर्देश देण्यात आले आहेत. उर्वरित जमिनीच्या भूसंपादनासाठी अधिसूचना काढण्याचे निर्देश एमआयडीसीला दिले आहेत. महाराष्ट्र विमानतळ विकास कंपनीला अधिक सक्षम करून राज्यातील निर्माणाधीन सर्व विमानतळे त्यांच्याकडे सोपवण्यात येणार आहेत. विमानतळ परिसरात स्वराज्यरक्षक धर्मवीर छत्रपती संभाजी महाराज यांचा भव्य पुतळा उभारण्याची घोषणाही यावेळी करण्यात आली. पुरंदर विमानतळाचा हा प्रकल्प पूर्ण झाल्यावर ते देशातील दुसरे सर्वात मोठे विमानतळ ठरेल.