विदर्भात गेल्या काही दिवसांपासून थंडीचा कडाका मोठ्या प्रमाणावर वाढला असून, अनेक जिल्ह्यांचा पारा दहा अंश सेल्सिअसच्या खाली घसरला आहे. उत्तर भारतातून येणाऱ्या शीतलहरींमुळे संपूर्ण विदर्भ गारठला असून जनजीवनावर याचा मोठा परिणाम झाला आहे. डिसेंबर महिन्याच्या शेवटच्या आठवड्यात विदर्भात थंडीचा कडाका खूपच वाढला आहे. प्रादेशिक हवामान केंद्राने दिलेल्या माहितीनुसार, २९ डिसेंबरला विदर्भातील अनेक शहरांमध्ये मोसमातील निच्चांकी तापमानाची नोंद झाली आहे. विशेषतः गोंदिया, नागपूर आणि यवतमाळ या जिल्ह्यांमध्ये थंडीची लाट अधिक तीव्र आहे. विदर्भातील विविध शहरांमधील तापमानाची आकडेवारी पाहता, थंडीची तीव्रता स्पष्ट होते. गोंदिया आठ पूर्णांक आठ, नागपूर नऊ पूर्णांक सहा, यवतमाळ नऊ पूर्णांक सहा, भंडारा दहा, गडचिरोली दहा पूर्णांक दोन, चंद्रपूर अकरा पूर्णांक आठ अंश सेल्सिअस तापमानाची नोंद झाली आहे.
हवामान तज्ज्ञांच्या मते, उत्तर भारतात सध्या जोरदार बर्फवृष्टी आणि कडाक्याची थंडी पडत आहे. राजस्थान आणि मध्य प्रदेशातून येणाऱ्या थंड वाऱ्यांमुळे महाराष्ट्रातील विशेषतः विदर्भ आणि उत्तर महाराष्ट्राच्या तापमानात मोठी घट झाली आहे. हवामान विभागाने विदर्भातील काही जिल्ह्यांसाठी येलो अलर्टचा इशारा दिला असून, पुढील अठ्ठेचाळीस तास थंडीचा कडाका असाच कायम राहण्याची शक्यता वर्तवली आहे. केवळ रात्रीच नव्हे, तर दिवसाच्या कमाल तापमानातही दोन ते तीन अंशांची घट झाली आहे, ज्यामुळे दिवसभर हवेत गारवा जाणवत आहे. कडाक्याच्या थंडीमुळे विदर्भातील नागरिकांच्या दिनचर्येत मोठे बदल झाले आहेत. पहाटे आणि रात्रीच्या वेळी ठिकठिकाणी शेकोट्या पेटवून नागरिक थंडीपासून संरक्षण करत आहेत. स्वेटर, कानटोप्या आणि जॅकेट्सची मागणी वाढली आहे.
पहाटेच्या वेळी अनेक महामार्गांवर दाट धुके साचत असल्याने दृश्यमानता कमी झाली आहे. यामुळे वाहनचालकांना कसरत करावी लागत आहे. थंडीचा हा कडाका गहू आणि हरभरा यांसारख्या रब्बी पिकांसाठी पोषक असला तरी, दव साचल्याने काही ठिकाणी पिकांवर रोगाचा प्रादुर्भाव होण्याची शक्यताही शेतकरी व्यक्त करत आहेत. वाढत्या थंडीमुळे सर्दी, खोकला आणि तापाचे रुग्ण वाढत आहेत. विशेषतः लहान मुले आणि वृद्धांनी काळजी घेण्याचे आवाहन डॉक्टरांनी केले आहे. डिसेंबरअखेर विदर्भ पूर्णपणे गारठला असून, नवीन वर्षाच्या सुरुवातीलाही हा गारठा कायम राहण्याचा अंदाज आहे. जर तुम्ही विदर्भात पर्यटनासाठी किंवा फिरण्यासाठी जात असाल, तर उबदार कपडे सोबत ठेवणे अत्यंत गरजेचे आहे.
