मुंबई महानगरपालिकेने आगामी निवडणूक प्रक्रियेत पारदर्शकता राखण्यासाठी आणि शहराचे सुशोभीकरण टिकवण्यासाठी आदर्श आचारसंहितेची कडक अंमलबजावणी सुरू केली आहे. १५ डिसेंबरला निवडणुकीची घोषणा झाल्यापासून अवघ्या दहा दिवसांत महापालिकेने मुंबईच्या कानाकोपऱ्यातून आठ हजार तीनशे हून अधिक अनधिकृत राजकीय फलक, पोस्टर्स आणि ध्वज हटवून एक मोठी कारवाई केली आहे.
निवडणूक आयोगाच्या निर्देशांनुसार, आचारसंहिता लागू होताच सार्वजनिक आणि खाजगी जागांवरील अनधिकृत राजकीय प्रचार साहित्य हटवणे बंधनकारक असते. मुंबई महापालिकेच्या अनुज्ञाप्ती विभागाने यासाठी युद्धपातळीवर काम करत शहराला बॅनरमुक्त करण्यासाठी मोहीम राबवली. महापालिकेने दिलेल्या अधिकृत आकडेवारीनुसार, एकूण आठ हजार तीनशे अनधिकृत साहित्यावर कारवाई करण्यात आली आहे. यामध्ये सर्वाधिक पाच हजार एकशे अठ्ठावीस हे राजकीय फलक आहेत. या कारवाईपैकी सात हजार सहाशे साहित्य हे रस्ते, पदपथ आणि सरकारी इमारतींसारख्या सार्वजनिक ठिकाणांवरून काढण्यात आले आहे, तर शहाशे पंच्याहत्तर साहित्य खाजगी जागांवरून विनापरवाना लावल्यामुळे हटवण्यात आले आहे.
महापालिका आयुक्त भूषण गगराणी यांनी सर्व विभाग कार्यालयांना आचारसंहितेचा भंग होणार नाही, याची खबरदारी घेण्याचे आदेश दिले आहेत. राजकीय पक्षांच्या चढाओढीमुळे शहराचे विद्रुपीकरण होऊ नये, यासाठी महापालिकेची पथके चोवीस तास कार्यरत आहेत. कोणत्याही राजकीय पक्षाचा भेदभाव न करता, अनधिकृत आढळणारे प्रत्येक बॅनर आणि पोस्टर तात्काळ काढले जात आहे. प्रत्येक प्रभागात विशेष भरारी पथके तैनात करण्यात आली आहेत, जी दररोज पहाणी करून नवीन लागलेले फलक हटवत आहेत. केवळ साहित्य जप्त न करता, मालमत्ता विद्रुपीकरण कायद्यान्वये संबंधित व्यक्ती किंवा संस्थांवर गुन्हे दाखल करण्याची प्रक्रियाही सुरू करण्यात आली आहे.
निवडणूक प्रक्रियेत सर्व उमेदवारांना समान संधी मिळावी, हा आचारसंहितेचा मुख्य उद्देश आहे. अनधिकृत फलकबाजीमुळे मोठ्या पक्षांना मिळणारा अवाजवी फायदा रोखण्यासाठी ही कारवाई अत्यंत महत्त्वाची ठरत आहे. नागरिकांनीही ॲपचा वापर करून अनधिकृत फलकांबद्दल तक्रारी कराव्यात, असे आवाहन प्रशासनाने केले आहे.
