स्वतंत्र बातमी

कोल्हापूर आणि सातारा जिल्ह्यांत ऊस गाळप हंगाम लवकरच सुरू होणार असून, या काळात राष्ट्रीय महामार्गावरून मोठ्या प्रमाणात वाहतूक होते. त्यामुळे वाहतूक कोंडी होऊ नये, यासाठी या महामार्गावरील भुयारी मार्ग आणि सेवा रस्त्यांची कामे तातडीने पूर्ण करण्याचे निर्देश सार्वजनिक बांधकाम मंत्री शिवेंद्रसिंहराजे भोसले यांनी दिले.

कराड येथे कोल्हापूर–सातारा राष्ट्रीय महामार्गावरील कामांचा आढावा घेण्यासाठी मंत्री शिवेंद्रसिंहराजे भोसले यांच्या अध्यक्षतेखाली बैठक घेण्यात आली. या बैठकीस आमदार मनोज घोरपडे, सार्वजनिक बांधकाम विभागाचे सचिव आबासाहेब नागरगोजे, राष्ट्रीय महामार्गाचे प्रादेशिक अधिकारी अंशुमाली श्रीवास्तव, प्रकल्प संचालक संजय कदम आणि उपसचिव सचिन चिवटे उपस्थित होते. तसेच कोल्हापूर आणि सातारा जिल्ह्यांचे जिल्हाधिकारी व पोलिस अधीक्षक दूरदृश्य प्रणालीद्वारे सहभागी झाले होते.

या बैठकीत मंत्री शिवेंद्रसिंहराजे भोसले यांनी सांगितले की, सध्या या महामार्गावर अनेक ठिकाणी भुयारी मार्ग आणि सेवा रस्त्यांची कामे सुरू असल्याने वाहतूक कोंडी निर्माण होते. ऊस गाळप हंगामात बैलगाडी आणि ट्रॅक्टरद्वारे ऊस वाहतूक मोठ्या प्रमाणात होणार असल्याने ही समस्या अधिक गंभीर होऊ शकते. त्यामुळे कंत्राटदारांनी कामांना वेग द्यावा आणि सर्व रस्ते, वळण मार्ग तसेच अपूर्ण रस्त्यांवरील कामे पूर्ण करून वाहतुकीस योग्य बनवावीत.

मंत्री भोसले यांनी पुढे सांगितले की, भुयारी मार्गांजवळील पर्यायी रस्ते देखभाल करून सुस्थितीत ठेवावेत. वाहतूक कोंडी टाळण्यासाठी पोलीस विभाग आणि जिल्हा प्रशासनाने समन्वय साधून प्रभावी नियोजन करावे. राष्ट्रीय महामार्ग क्रमांक अठ्ठेचाळीसवरील वाहतूक कोंडी होणाऱ्या ठिकाणी क्रेनची व्यवस्था ठेवण्यात यावी तसेच ट्रॅफिक वॉर्डन नेमून त्यांची सेवा कोल्हापूर आणि सातारा पोलिसांच्या अखत्यारीत द्यावी, असे निर्देशही त्यांनी दिले.

राष्ट्रीय महामार्ग विभागाचे अभियंता अंशुमाली श्रीवास्तव यांनी माहिती दिली की, भुयारी मार्गांच्या कामांना गती देण्यात आली असून, ज्या ठिकाणी वाहतूक कोंडी होते तेथे ट्रॅफिक वॉर्डन नियुक्त करण्यात येतील. तसेच वळण रस्त्यांचे डांबरीकरण व दुरुस्तीचे काम सुरू आहे. कराड परिसरातील रस्त्याचे काम दीड महिन्यांच्या आत पूर्ण करण्याचे उद्दिष्ट ठेवण्यात आले असून, या निर्णयांमुळे आगामी ऊस हंगामात वाहतूक अधिक सुरळीत होणार आहे.