स्वतंत्र बातमी

पालघर जिल्ह्यातील राष्ट्रीय महामार्गावर अनेक ठिकाणी स्थानिक नागरिकांकडून अनधिकृतपणे दुभाजक तोडून रस्ता ओलांडण्यासाठी छेद तयार करण्यात आले आहेत. हे अनधिकृत छेद महामार्गावरील भीषण अपघातांचे मुख्य केंद्र ठरत आहेत. या समस्येवर तात्पुरती मलमपट्टी न करता कायमस्वरूपी उपाययोजना राबवण्याचा निर्णय जिल्हा प्रशासनाने घेतला आहे. त्यानुसार या ठिकाणी मेटल बीम क्रॅश बॅरियर आणि न्यू जर्सी क्रॅश बॅरियर लावण्याचे काम हाती घेण्यात येणार आहे. पादचाऱ्यांचे अपघात रोखण्यासाठी महामार्गावर नवीन सहा पादचारी पूल मंजूर करण्यात आले आहेत. हे पूल तलासरी, निलगिरी हॉटेल, आंबोली, खानीवडे, बापाने आणि ससुनवघर या अपघातप्रवण क्षेत्रांवर उभारण्यात येणार आहेत. यापूर्वी मंजूर असलेल्या दहा पादचारी पुलांचे काम पूर्ण झाले असून त्याचा वापर सुरू आहे. पुढील तीन महिन्यांत महामार्गावरील अपघातांचे प्रमाण कमी करण्यासाठी सर्व विभागांना सूक्ष्म नियोजन करण्याचे बंधनकारक करण्यात आले आहे.

अपघातानंतरच्या पहिल्या तासात म्हणजेच ‘गोल्डन आवर’मध्ये जखमींना त्वरित उपचार मिळणे आवश्यक असते. यासाठी महामार्गावरील मोक्याच्या सहा ठिकाणी २४ तास रुग्णवाहिका तैनात ठेवण्यात येणार आहेत. यामध्ये चार बी.एल.एस. आणि दोन ए.एल.एस. रुग्णवाहिकांचा समावेश आहे. या सर्व वाहनांची गती आणि अचूक स्थान तपासण्यासाठी त्यांचे जीपीएस लॉग नियमितपणे रस्ता सुरक्षा समितीपुढे सादर करावे लागणार आहेत. महामार्गालगत टाकला जाणारा बांधकामातील कचरा आणि अनधिकृत पार्किंगवर पोलीस आणि प्रादेशिक परिवहन विभाग संयुक्त मोहीम राबवून कडक कारवाई करणार आहेत. मेंढवण घाटातील अपघातांची मालिका खंडित करण्यासाठी सध्या रम्बलर मार्किंग, स्ट्रीट लाईट्स आणि शेवरॉन बोर्ड्स लावण्यात आले आहेत. येथील कायमस्वरूपी रस्ता सुधारणेसाठी ६६७२ चौ.मी. जमीन संपादनाचा प्रस्ताव राष्ट्रीय महामार्ग प्राधिकरणाच्या वरिष्ठ कार्यालयाकडे पाठवण्यात आला आहे. मुंबई-वडोदरा एक्सप्रेसवे सुरू झाल्यानंतर येथील वाहतुकीचा सविस्तर अभ्यास करून पुढील अंतिम बदल केले जाणार आहेत. अपघातग्रस्तांना तात्काळ आणि रोखरहित उपचार मिळवून देण्यासाठी शासकीय योजनांचा प्रसार करण्याचे निर्देश देण्यात आले आहेत.