पावसाने दडी मारल्याने भातपिके करपली

उरण तालुक्यातील खोपटे, नागाव, चिरनेरसह अनेक भागांत पावसाअभावी शेतीची जमिन कोरडी पडली आहे.

उरण हा औद्योगिक पट्टा म्हणून ओळखला जात असला तरी नागाव, केगाव, चाणजे, खोपटे, कोप्रोली, चिरनेर, विंधणे, रानसई, वशेणी, पूनाडे, आवरे, पाले, पिरकोन, वेश्वी, गोवठणे आणि बोरखार या ग्रामीण भागात आजही सुमारे २५०० हेक्टरपेक्षा जास्त क्षेत्रावर भातशेती केली जाते. यातील बहुतांश शेती खाडी किनाऱ्यावर आहे. समुद्राच्या भरतीचे पाणी शेतात शिरून दरवर्षी जमिनीचे नुकसान होते. परिसरातील विविध उद्योगांमुळे पाण्याचे नैसर्गिक प्रवाह बंद पडले आहेत.

जुलैच्या सुरुवातीला झालेल्या पावसावर शेतकऱ्यांनी पेरण्या पूर्ण केल्या होत्या. त्यानंतर झालेल्या अतिवृष्टीने पहिली रोपे कुजली. शेतकऱ्यांनी तात्काळ दुबार पेरणी केली. आता रोपे उगवून आल्यानंतर सलग दहा दिवस पाऊस गायब झाला आहे. कडक उन्हामुळे शेतातील पाणी आटले असून रोपे मूळ धरण्यापूर्वीच करपून जात आहेत.