स्वतंत्र बातमी

पुणे शहरात दरवर्षी पावसाळ्यात कीटकजन्य आजारांचा प्रादुर्भाव दिसून येतो. मागील वर्षीच्या तुलनेत यंदा जून आणि जुलै महिन्यात डेंग्यूच्या संशयित रुग्णांची संख्या वेगाने वाढली आहे. जानेवारीत २५, फेब्रुवारीत २३, मार्चमध्ये २६, एप्रिलमध्ये ४१ आणि मे महिन्यात ५८ संशयित रुग्ण नोंदवले गेले होते. जून महिन्यात ही संख्या थेट १७५ वर पोहोचली. महापालिकेच्या आरोग्य विभागाने डासोत्पत्ती स्थाने नष्ट करण्यासाठी विशेष मोहीम आखली आहे. साचलेल्या पाण्यावर औषध फवारणी तसेच गप्पी मासे सोडण्याचा उपक्रम राबवला जात आहे. डासांची पैदास आढळणाऱ्या सोसायट्या आणि व्यावसायिकांना दंडात्मक नोटिसा बजावण्यात येत आहेत. पुढील काही आठवड्यांत पावसाचा जोर कायम राहिल्यास रुग्णसंख्या वाढण्याची शक्यता लक्षात घेऊन महापालिकेने सर्व दवाखाने व रुग्णालयांना उपचाराची पूर्वतयारी ठेवण्याचे आदेश दिले आहेत.