स्टार प्रवाहवरील लोकप्रिय मालिका ‘घरोघरी मातीच्या चुली’ सध्या प्रेक्षकांच्या मनाचा ठाव घेते आहे. प्रत्येक भागातून नवी भावनिक छटा उलगडणारी ही मालिका आता एका अत्यंत उत्कंठावर्धक टप्प्यावर पोहोचली आहे. कारण या मालिकेत आता एका नव्या व्यक्तिरेखेचं वादळी आगमन होणार आहे. आणि ती व्यक्तिरेखा म्हणजे मकरंद. हा मकरंद म्हणजे जानकी आणि ऋषिकेशच्या नात्यातलं एक असं वादळ जे त्यांच्या प्रेमकथेचा सारा प्रवाहच बदलून टाकणार आहे.
कथानकानुसार, मालिकेत आता एक मोठा भूतकाळ दाखवला जात आहे. कथा तब्बल बारा वर्षे मागे जाते, जिथून ऋषिकेश आणि जानकीच्या प्रेमकथेचा आरंभ झाला होता. त्यांच्या भेटीचा, प्रेमाचा आणि संसाराचा प्रवास कसा सुरू झाला हे आता प्रेक्षकांना पाहायला मिळत आहे. पण या प्रवासात एक अडथळा म्हणून मकरंदचा प्रवेश होतो. जानकीवर एकतर्फी प्रेम करणारा हा तरुण तिच्या आयुष्याचा एक भाग व्हावा अशी त्याची तीव्र इच्छा आहे. मनोमन तो जानकीला आपली पत्नी मानतो आणि तिचं प्रेम मिळवण्यासाठी कोणत्याही थराला जाण्यास तो तयार आहे.
मकरंदचं पात्र एकाच वेळी प्रेमळ आणि धोकादायक आहे. त्याची संकोची वृत्ती आणि त्याचं दडपलेलं प्रेम यामध्ये एक प्रकारचा ताण दिसून येतो. बाहेरून शांत दिसणारा मकरंद आतून मात्र भावनांच्या वादळात गुरफटलेला आहे. जानकी-ऋषिकेशच्या प्रेमात निर्माण झालेला हा भावनिक संघर्ष मालिकेचं आकर्षण वाढवतोय.
या व्यक्तिरेखेला जीवन देतोय अभिनेता कश्यप परुळेकर. मराठी मालिकांमधील एक परिचित आणि प्रभावी नाव असलेल्या कश्यपने ‘मन उधाण वाऱ्याचे’पासून प्रेक्षकांच्या मनात आपली जागा निर्माण केली होती. आता तो ‘घरोघरी मातीच्या चुली’मध्ये मकरंदची व्यक्तिरेखा साकारत असून त्याचा अभिनय मालिकेला नवी उंची देतो आहे.
कश्यप परुळेकरने या भूमिकेविषयी सांगताना म्हटलं की “स्टार प्रवाहसोबत माझं नातं खूप जुनं आहे. या मालिकेतला मकरंद हा एक हुशार, स्वबळावर विश्वास ठेवणारा आणि आपल्या प्रेमासाठी झगडणारा माणूस आहे. जानकीचं प्रेम मिळवण्यासाठी तो काय काय करतो हे मालिकेच्या पुढील भागांत पाहायला मिळेल.” असं ही तो म्हणाला.
मालिकेच्या दिग्दर्शन, अभिनय आणि कथालेखन या तिन्ही बाजूंनी सध्या चांगली ताकद दिसून येते आहे. भूतकाळ दाखवलेली ही कहाणी मालिकेला नवा रंग देते आहे. प्रेक्षकांसाठी हा काळ म्हणजे आठवणींचा आणि उत्कंठेचा संगम ठरतो आहे.जानकी आणि ऋषिकेशच्या प्रेमप्रवासात आता मकरंदच्या आगमनाने निर्माण झालेला भावनिक संघर्ष पुढे काय वळण घेईल हे पाहण्यासाठी प्रेक्षक आतुरतेने पुढील भागांची वाट पाहत आहेत. घराघरात मातीचा सुगंध पसरवणारी ही मालिका आता भावनांच्या नवा वादळ घेऊन परतली आहे आणि त्या वादळाचं नाव आहे मकरंद.
‘घरोघरी मातीच्या चुली’ मालिकेत कश्यप परुळेकरच्या दमदार आगमनाने कथानकाला नवी गती मिळाली आहे. जानकी-ऋषिकेशच्या नात्यात उभं राहिलेलं हे वादळ मालिकेचं खरं आकर्षण ठरलं आहे. प्रेम, संघर्ष आणि भावना यांचा सुंदर संगम असलेली ही कथा आता आणखी रंगतदार होणार आहे. प्रेक्षकांचे मनोरंजन करण्यासाठी ही मालिका आता कुठलं वळण घेते पाहणं उत्सुकतेच ठरणार आहे.
